uMthunywa
NGESIKHATHI uHulumende wakuleli ezama ukuphakamisa omama ngokubanikeza amathuba alingana lawabesilisa emisebenzini, abanye abesifazana balokhu bedonsela emuva ngoba becabanga ukuthi lokho kungeke kwenzeke.
Zinengi izizatho esingaziqamba ezitshengisa ukuthi omama abanengi balokhu bezikhangelela phansi ingabe bezeyisa.
Ungakhangela emakolitshini amanengi abafundi besifazana lokhu bebalutshwana kukanti njalo kuleminye imisebenzi lapho abesifazana abalokhu besesabela khatshana ukuyingena ngoba bekholwa ukuthi ngumsebenzi wabesilisa.
Okusuka kumangalise yikuthi pho uhlelo lolu lwasungulelwa bani njengoba omama besesaba ukusekela lona lujonge ukubapha amandla lokubaphakamisa emisebenzini lasempilweni jikelele.
Ngenxa yeminyaka eminengi abayiqeda bencidezelwe, abanye omama balokhu besesaba ukuphakanyiswa. Lanxa amathuba evuleka phambi kobuso babo, abanye balokhu besesaba ukuwathatha ngoba becabanga ukuthi amadoda yiwo wodwa afenele ukuthatha amathuba lawo.
Ukuzeyisa lokhu kucina kungenela lasempilweni zabo, ngaphandle komsebenzi. Abanye lasemizini yabo bayesaba ukwenza izinqumo bebodwa. Abanye lezinye izinqumo umuntu angazenza eyedwa njengomama weguma, bakhetha ukumelela omkabo ukuze bazwe ngabo.
Abantu bakhona nxa sekubangenile lokhu okungumoya kokuzeyisa, akubi lanto nye asuthiseka ngayo ngempilo yakhe. Isikhathi sonke umuntu wakhona uhlala engozisolayo ukuba nguye kwakhe. Umuntu aze afise lokuba ngomunye umuntu.
Bakhona omama abangasuthiseki lasibi sombala wejwabu labo, abacabanga ukuthi umuntu ukuze abe muhle kumele agcobe amanye amafutha aphendulayo. Ufica umuntu eselemibala emibili, ubuso bumhlophe okomlungu kodwa umzimba umnyama uthe khaca. Kwamanye amazwe athuthukileyo baqonda ukuyahlinzwa ukuze bafakwe ijwabu elimhlophe elibenza bakhangeleke njengabamhlophe kodwa bona bezelwe bemnyama.
Konke lokhu kungenxa yemibono yabantu abathi owesifazana ukuze abe muhle, abukeke kumele abemhlophe okomlungu.
Kuqakathekile ukuthi omama bazethembe kukho konke abakwenzayo. Ukuzethemba kuyabasiza ukuthi benelise ukwenza noma yini kungenani lemibono yabantu yokubeyisa.
Kungumbono woMthunywa ukuthi nga abantu besifazane bekela umkhuba wokuzeyisa lokuzikhangelela phansi ngoba ukuba ngomama akutsho ukuthi akulanto abazi ukuyenza . Ukuzethemba kulakho njalo ukubasiza ekunanzeleleni amathuba avuleka phambi kwabo.
