uMthunywa
KUYONALE iviki kunkundla zokuxhumana kanye lakumabonakude bezindaba abatshiyeneyo kube lendabamlonyeni yomunye umphurofethi welizwe leSouth Africa okubikwa uvuse enye indoda yakuleli kwabafileyo.
Ividiyo le esabalale kakhulu kunkundla zokuxhumana itshiye abantu abanengi bethandabuza ukuthi kungabe ngempela kuliqiniso ukuba leyondoda ibifile loba kube “yisimanga” nje esihleliweyo ukuze abantu babone angathi lowomfundisi wenze isimanga.
Kuvidiyo le echothozwe ngabanengi bekulendoda ebiphakathi kwebhokisi ebikhanya ivule umlomo eyiyo ekhulekelwe ngumphurofethi lo yavuka kwabafileyo.
Indoda le kubikwa yabhubha ngoLwesihlanu ngeviki ephelileyo yahlala amalanga amathathu emotsha andubana iyokhulekelwa kulelobandla ivuke ithi khwatshu kwabafileyo.
Isimanga ngendoda le okubikwa ibifile yikuthi lapho ebihlala khona omakhelwane bayo kabakwazi ukuthi yafa njalo baze babakwazi ngalokhu sebebona ividiyo le.
Esintwini nxa kungaba lemfa abantu, ikakhulu omakhelwane abayibo abaseduzane yibo abaqala ukuzwa umkhosi okwenza kuthandabuzeke ukuba lundoda engabe wayefile ngempela.
Kubalulekile ukuthi uzulu alimuke njalo angalokothi akholwe masinya lokho akubonayo kodwa ulomlandu wokuthi aqedisise ukuba lokho okwenzakalayo kuliqiniso njalo ulobufakazi ngoba lokhu kungabangela ukulahleka kwabo endleleni yeNkosi ngoba leBhayibhili elingcwele liyatsho ukuba kayisibo bonke abathi Nkosi, Nkosi abazawubona umbuso wezulu.
Amanye amandla kawaveli eNkosini ngitsho kodwa avela emgodini womubi.
Kungumbono waleliphephandaba ukuthi labo abenza izimanga, amasalamusi kumele bakwenze lokhu ngenhlonipho njalo bangadukisi abantu.
Kukanengi sisizwa ngabaphurofethi abenza izimanga ezehlukeneyo emabandleni kodwa lokho akutsho ukuthi lezozimanga ziba khona ngenxa yamandla eNkosi alapho.
Kuhle ukuba abantu bahlole amandla asetshenziswayo nxa befika emabandleni njalo bafunde umbhalo ukuze babone ukuba lokho abakubonayo kuyahambelana yini lencwadi endala engaguqukiyo.
Kulezinsuku sokunzima ukuthi ukholweni ngoba phela kugcwele abantu kanye labaphurofethi abenza “izimanga”, amasalamusi angaziwayo lokuthi amandla okuwenza bawafukula kuwuphi umgodi kodwa-ke iBhayibhili yilo kuphela elingaqondisa abantu endleleni eyiyo.
