uMthunywa
KULENDABA esegudwini emalokitshini akoBulawayo eyokudakwa lokugida okwenziwa ngabantwana bezikolo kulezinsuku njengoba sebelenyanga ezintathu bevalile izikolo ngenxa yokuqhamuka komkhuhlane weCovid-19.
Kulezinsuku abantwana bagcwala emigwaqweni kuthi emakhoneni loba endaweni ezicatshileyo ubathole bebuthene kutshintshwana izigubhu zotshwala kanye lezidakamizwa ezehlukeneyo ezibalisa imbanje, leNgoma.
Kuyaziwa ukuthi abantwana bezikolo bandise ukuzithokozisa kodwa okwakulezinsuku kungathi kabasoze baphinde babuyele emabhentshini ezikolo. Yebo, lakudala bekukhona, kodwa okuvuse amehlo ngokujabula kwabantwana bakulezinsuku yikuthi sebedlulisa amalawulo njalo kabasaziphi ngitsho isikhathi sokubala lengwalo zabo.
Pho bakuthatha ngaphi lokhu? Kungumbono kaMthunywa ukuthi indlela abantwana abathanda ngayo utshwala lokugida bayithatha ebadaleni. Abadala abasakwazi ukuhlonipha umphakathi lalapho sebedle amabele.
Uthola inkalakatha yendoda ibunatha phambi kwabantwana etshabhini. Lasezindlini abantwana abasakhuzwa ngoba abadala sebetshonela ukugida lokunatha utshwala. Abantwana basuka bakholwe ukuthi le yiyo indlela efaneleyo. Yikho phela sebezithathela izidakamizwa bengagqize qhakala ngoba bakubona kuyinto eqondileyo, kukanti babulala ikusasa yabo.
Yibutshapha lobu. Ikusasa yabantwana isengozini njengoba sebeqakathekisa ukukholisa endaweni yokuthi balungiselele imihloliso.
Okudanisayo yikuthi labantwana abasakhuzeki, sebejola labantu abalingana laboyise. Yisiga esesabekayo lesi, esenyanyisayo njalo esilihlazo emphakathini.
Kambe kwehlulani ukuthi abazali bakhangele impilo yabantwababo. Ubutshapha lobu buphele.
Kungumlandu wethu njengomphakathi ukuthi sisukume sibone ukuthi ubutshapha babantwabethu kumele buphele. Asifuni intanga le esakhulayo icine ifunda ukuba ngamabele endlela.
Yikho phela lapha okuqala khona ukungaziphathi. Kambe yisizwe bani esingagcwala abantwana abanathayo, ababhema nsukuzonke?
Umkhuba lo ulokhe usanda endaweni ezinengi koNtuthu.
Sikhuthaza inhlanganiso ezibona ngempilakahle yezakhamizi ezifana lama-resident associations ukuthi zibone ukuthi imikhuba emibi efana lale iyaqedwa emphakathini.
Ukusebenzelana ndawonye kwamapholisa labazali kubalulekile kakhulu ukuqeda umkhuba lo omubi.
Kumele abantwana abasezikolo bavikelwe ebubini, bacetshiswe ngendlela eyiyo. Lokhu akudingi umzali oyedwa kodwa sonke isigaba kumele sisebenze, kukhuzwe abantwana.
Kungakho kungumlandu womuntu wonke ukuthi kuqedwe ubutshapha lobu.
