uMthunywa
IBHAYIBHILI elingcwele lithi indoda izadla izithukuthuku zayo ngemva kokuba isebenze nzima emhlabeni. Okusuka kudanise yikuthi lanxa incwadi le iveza sobala ukuthi njengabantu kumele sisebenze ukuze sithole ukudla, kulabanye abantu abafuna ukudla amandla abanye abantu, bengafuni ukusebenza ngokusebenzisa ubuthakathi.
Kuviki ephelileyo iphephandaba leli beliqukethe indaba ehlasimulisa umzimba, eyomfanyana weChipinge owanyamalala eleminyaka eyisikhombisa otholakale eseleminyaka engu-12 okubikwa ukuthi ubesetshenziswa kumisebenzi yobuthakathi.
Abazali bomntwana lo lanxa basebeqede iminyaka emihlanu bengamboni umntanabo kabazange balahle ithemba ngoba befisa nje ukuthi babone amathambo omntanabo.
Umntwana lo kuvele ukuthi ubegcinwa phakathi kobhalu egangeni njalo edliswa inyama eluhlaza. Akwaziwa ukuthi inyama abeyinikwa ngeyenyamazana loba ngeyabantu kodwa leyonyama ubeyidla iluhlaza.
Kuyacaca ukuba kulabantu abagangileyo emphakathini abenzela abanye abantu ulunya baze babathathele abantwababo. Isimanga yikuthi isalukazi okuyiso okuthiwa sasithethe umntwana lo kasizange siphike ngitsho ukuthi besimsebenzisa.
Ekuphileni kwethu sasizwe ukuthi kulabantu abenziwa imikhoba ngabanye abantu ngoba befuna ukubasebenzisa kumisebenzi yabo yebumnyameni. Lokhu kutshengisa ukuthi njengabantu kasithandani ngitsho njalo kasilandaba ngitsho lobuhlungu obuzwiwa ngomunye umuntu.
UNkulunkulu edala umuntu wamnika amandla okukhetha akufunayo empilweni, pho kungani kulabanye abantu phakathi kwethu abakhethela abanye abantu? Angithi nxa umuntu esezathatha umntwana womunye umuntu amenze umkhoba kutsho ukuthi yena usemkhethela lowo mntwana kanye lomzali wakhe impilo okumele ayiphile kukanti lawo mandla kumele abe ngawakhe njengokuwanikwa kwakhe nguNkulunkulu.
Umbuzo okhona yikuthi kungani kumele siloye abanye abantu. Lanxa umuntu efuna inotho kungangcono athengise emkambo ukuze aziphilise kulokuthi athwalise nzima omunye umuntu ngenxa yokufuna inotho. Ubuthakathi yinto embi kakhulu njalo engabusisekanga ngitsho empilweni.
Kwezinye izikhathi sasizwe njalo ngabazali abaloya abantwababo. Umbuzo okhona yikuthi kungani kumele uloye igazi lakho? Lokhu kutshengisa ukuthi njengabantu abansundu kasilathando komunye lomunye umuntu.
Kungumbono woMthunywa ukuthi njengabantu abansundu sitshiyane lomkhuba wokusebenzisa abantwana babanye abantu kanye labethu ekwenzeni imikhuba yokuganga. Wonke umuntu ulamalungelo njalo kumele azikhethele akufunayo empilweni hatshi ukuthi abanjwe ngamandla.
