uMthunywa
ISIKHATHI somqando sesifikile kwelakithi. Abantu sebetholakala bembethe amajazi athinta phansi, abanye njalo begqoka lengowane eziphosa zivale ubuso ngoba besesaba umqando. Ezinyaweni lapha abalezimali zabo babonakala bevathe amathenisi amade aphosa afike emadolo. Ngeke bawuzwe umqando abagqoke ngalindlela.
Kodwa phela iminwe ayilingani, bakhona abangenelisiyo ukuzithengela impahla le eyokuzivikela kulo umqando.
Lababantu badinga ukuncedwa ukuze labo phela benelise ukuphila impilo efana leyethu.
Umqando uyingozi kakhulu nxa usuke wangena emzimbeni womuntu. Bakhona asebabulawa ngumqando kuminyaka edluleyo. Lokhu kuyadanisa njalo kusinika umlandu wokuba sithathe yiloba yiphi impahla esezindlini zethu ekhudumalayo esingasayigqokiyo siyeyinikeza lababantu abaswelayo ngoba lonyaka kukhanya kuzagodola okwedlulisileyo njengoba izulu libe linengi.
Bakhona ogogo, okhulu kunye lentandane ezigciniweyo kunhlanganiso ezitshiyeneyo. Lababantu badinga impahla le ngamehlo abomvu. Ngesikhathi sembethe impahla le ekhudumalayo kubuhlungu kudabula inhliziyo ukubona umntwana esiya esikolo engelajesi kunye lezicathulo.
Kungumlandu wabaphathisikolo kunye labancedisi babo ukuthi bacelele abantwana laba impahla loba ingeyakudala ukuze labo benelise ukuhlala ekilasini balalele okukhulunywa ngumbalisi bengaqhuqhi. Inengi labazali liyabe lilamajesi akudala ezindlini ayegqokwa zingane zabo ngesikhathi zisafunda.
Kungakho-ke nxa kube lomhlangano umphathisikolo acele impahla le ukuthi izenceda abantwana abaswelayo asikholwa ukuthi ukhona umuntu ongathi isikolo siyamhlolela.
Ukuncedana empilweni kuqakathekile kakhulukazi. Uthola ukuthi umuntu olenhliziyo yokunceda uyaphumelela nanku phela ubani lobani uyazi ukuthi sibusisiwe isandla esiphayo kulesamukelayo.
Kungumlandu wethu sonke ukuba sigcine asebekhulile kunye lentandane lalabo abagula ingqondo. Inengi labo phela alisela zihlobo, selikhangelele kuzulu olozwelo ukuba ancede. Nxa sizakhangela eceleni sithi cha, asilalutho ozabasiza ngubani? Sizakuba yinhlekisa ngitsho lakwamanye amazwe ngoba siveze ubuyanga bethu.
Kumele sazi njalo ukuthi ngoLwesibili kuviki ezayo sinanza i-Africa Day — ilanga lokuzalwa kweAfrica, ilanga lokunanza ubuntu bethu ngakho-ke akulandlela esingabunanza ngayo ubuntu bethu engedlula ukunceda abaswelayo abaphakathi kwethu.
Ukuzalwa kweAfrica kwakusitsho ukuthi uZibuse usesondele kumazwekazi eAfrica njalo lokhu kwakusitsho ukuphela kokucindezelwa kwabansundu. Ukuphela kokucindezelwa kwakusitsho ukuthi abantu sebezahlala ngokujabula. Ukujabula lokhu kutsho ukuthi wonke umuntu uzathola lokhu okwenza impilo zabantu zibelula.
Kuyasweleka-ke ukuthi sithi sijabula sigiya sijabulela iAfrica Day singakhohlwa abasweleyo esihlezi labo, imhambuma egcwele emigwaqweni kuzwekazi leAfrica.
