uMthunywa
UKUNGAZIPHATHI kukhanya kuyanda elizweni lakithi okuyinto edanisayo ngoba ukungaziphathi lokhu kulempumela embi ebuntwini bethu.
Kulezinsuku ukubanjwa ngamandla ukuya emacansini kukhanya kungokunye okuya phambili ngamandla kodwa iqiniso yikuba kakho umuntu othanda ukubanjwa ngamandla ukuze aye emacansini.
Akusela ukuthi ngugogo, ngumama kumbe lusane olusaphuma uchago emakhaleni, bonke sebengabahlaba umkhosi ofanayo.
Kambe nxa umfanyana omncinyane ezahudula ugogo wakhe amhlubule impahla akuhloli na lokhu? Kubizwa kuthiweni!
Uthole ugogo esetshudula ukuthi azikhulule kumzukulu wakhe amondlayo waze wakhula ukuze amhlukuluze kanje?
Ingane sezikhula sezilemikhuhlane efana legcikwane ngoba zibanjwe iganyavu ngumuntu ezihlala laye. Kuyadanisa lokhu, kuyahlukuluza umphefumulo womuntu owazi ubuhlungu bokuzala.
Kuviki ephelileyo elinye lamaphephandaba likhiphe udaba lwejaha lakwelinye ilokitshi koBulawayo elilangazelela ukuya emacansini lonina olizalayo okuze kwabangela ukuthi unina walo alidonsele emthethwandaba esiyacela ukuba umthetho umvikele kundodana yakhe le ekhohlakeleyo.
Kambe nxa umntwana esezahawukela unina omzalayo aze afise lokuhlangana laye emacansini kulihlazo elinganani. Angithi lokhu kwenziwa zinyamazana hatshi thina abantu esanikwa ingqondo njalo esazi ukuhlonipha.
Khona abasakhulayo nxa sebezaziphatha ngale indlela imvelo ngokwayo ithini ngathi uluntu?
Isenzo sikajaha lo sitshwaqisa umzimba ngoba kakho umzali ngitsho loyedwa oke akhumbule ukuya emacansini lomntwana amzeleyo. Kuyadingeka ukuba abatsha bahloniphe bekele ukuvumela imizwa yabo ibakhulela icine ibenza bafise lokwenza lokunye umuntu ayengeke akukhumbule.
Nxa umzali ezabanjwa iganyavu ngumntanakhe amzeleyo, kambe lowomntwana angaphinda aphumelele na empilweni? Khona ukhula abe ngumuntu onjani kwelakusasa? Angithi lelizwi elingcwele lithi abantwana bamukela izibusiso ezivela kubazali babo, pho umntwana uzaphumelela njani nxa esezathukwa ngumzali wakhe?
Nxa omama bezahlutshulwa impahla ngabantwababo, bazenelisa ukusiphatha njengamaqanda na? Khona bangaphinda babone abantwababo njengezibusiso na ezivela kuMdali?
Abantu, ikakhulu abesifazane, sebephilela evalweni, ngoba sekungathi wonke owesilisa usephenduke isitha sakhe.
Lokhu kwakungaziwa elizweni lakithi, sasikubonela kumabhayisikopo simangala ukuthi kulabantu abangaphila njengenyamazana.
Lamuhla sesiphila phakathi kwakho lokhu kuphila okungathi kusabhayisikopo.
Kuyadingeka ukuba umthetho ube lezijeziso ezinde zalabo abaphambanisa ubuntu bethu. Umuntu akumelanga esabe umthetho kuphela kodwa kumele agcine ubuntu bakhe.
Kungumbono waleliphephandaba ukuba lokhu ukungahloniphi kwamajaha kungabe kubangelwa yizidakamizwa abazisebenzisayo kungakho-ke kuhle ukuba abatsha batshiyane lazo ukuze siphile impilo elokuhloniphana njalo enhle.
