uMthunywa
ZINENGI indaba eseziphume kumaphephandaba zikhuluma ngokona okwenziwa yinkosazana ezindaweni ezitshiyeneyo zelizwe. Okusuke kusidabule inhliziyo yikuthi inkosazana iwona emizini yabantu kanye lezibayeni zabo.
Kuviki ephelileyo ngoLwesibili ntambama kubikwa kulesiqinti esingaphansi kwenduna uNjelele eGokwe South esalahlekelwa zinkomo ezingu-20 kanye labantu abane busuku bunye ngemva kokuphazima kwenkosazana.
Lokhu izulu liqalileyo ukuna sezizinengi ingozi esezenzakele zibangelwa yinkosazana. Kungakho-ke silokukhathazeka okukhulu ngalokhu okwenzakala elizweni lakithi. Konakale ngaphi kambe bakaMthwakazi? Sikhuthaza abadala abazi ngezamasiko ukuthi bake bahlanganise amakhanda bahluzisise ngalinsindabaphenduli eyehlele ilizwe lethu. Hlezi ukona kwenkosazana kumemetheke kuze kuphose kuqede isizwe sonke ngoba phela inengi labantu lingabona ukuthwala kwezulu lihle liqale ukuhlalela evalweni nanko phela kayikhethi itshaya abantu itshaye ngitsho lemfuyo yethu.
Ngalokhu sikhuthaza amabandla bezokholo labosiyazi ukuthi bake bazame icebo lokudingisisa ngembangela yalokhu, phela inkukhu iyawusola umumbu. Izikolo lazo njengoba sezivuliwe sizikhuthaza ukuthi ngesikhathi nxa bebona izulu lithwala, baphange bakhuthaze abantwana ukuthi basuke ngaphansi kwezihlahla ngoba esikhathini esinengi yizo ezandise ukutshaywa yinkosazana.
Okunye abantwana kumele bahlale emakilasini bachume bangagcwali indawana yonke ngoba konke lokhu kubenza babesengozini. Kulabo abahlala endaweni ezikhatshana sikhuthaza ukuthi bakhululwe ngokuphangisa ukuze batshintshe bayefika emakhaya izulu lingakani.
Izolo vele angithi besifundiswa ukuthi nxa izulu elikhulumayo lisina kumele sihlale phansi sichume hlezi ulaka lwalo lwehlele emuntwini. Kungumbono kaMthunywa ukuthi kubalulekile ukuthi izikolo zifundise abantwana ngengozi yenkosazana ukuze kuthi lanxa seliqala ukuna izulu bakwazi ukuthi bangazivikela ngokuba sendaweni ezinjani.
Umlandu usukithi sonke bakaMthwakazi ekunanzeleleni lasekuqapheleni abantwana emakhaya ngesikhathi izulu lisina.
Izihlahla ezisemphakathini ezake zatshaywa yinkosazana kumele zitshiswe njalo ezinye okumele ziganyulwe yilezi ezingabe zafela umuntu mhlawumbe ngokuzibophela kumbe ngenye ingozi enjalo.
Kuhle ukuthi abantu bakwazi ukuba bazivikele ngokungacatshi ngaphansi kwezihlahla, ukubamba impahla yensimbi kukanti kumele bananzelele njalo ukuba izifuyo zitshaywa yinkosazana ngenxa yokuthi isihlahla singatshaywa ngumbane uyaqhubeka uhamba phansi usiya kuzifuyo eziseduzane kwaso. Okungenziwa yikuthi kuhlanyelwe izihlahla zibe ngumfolo emadlelweni ngoba izihlahla zingaba zinengi kazitshaywa, kutshaywa isihlahla esisodwa esikhulu.
Kungumbono kaMthunywa ukuba kunganciphiswa ukona kwenkosazana nxa kungathathwa amanyathelo afaneleyo okuvikela abantu kunye lezifuyo.
