Uncategorized

UMBONO WOMTHUNYWA: Asibuyiseleni ubuhle bezikolo kulokhu obabuvele buyikho khona

18 Apr, 2019 - 00:04 0 Views
UMBONO WOMTHUNYWA: Asibuyiseleni ubuhle bezikolo kulokhu obabuvele buyikho khona

uMthunywa

UKUHLONIPHEKA kwezikolo elizweni lakithi kuya kusehla  okuyinto edanisayo kakhulukazi.

Abazali bebesithi nxa behlawulela abantwana ukuthi bayefunda besazi mhlophe ukuthi abasoze banikwe ukudla kwengqondo kuphela kodwa bazafundiswa konke umuntu adingakala ukuthi abelakho ukuze akhule engumuntu ohloniphekayo.

Babefundiswa uthando, ukuzwelana, isineke kunye lokuhloniphana.

Imfundiso le babeyijeziselwa nxa beyephulile kuthi nxa bebona angathi umntwana ngukhanda liyatsha kubizwe abazali balo umfundi baxoxe labaphathi kulenhloso yinye ngoba kusaziwa ukuthi impilo yomntwana isezandleni zabo bonke.

Ngenxa yalokhu abazali babethi umntwana angenelisa iminyaka eyisikhombisa eyiyo umntwana ayeqala ngayo ukufunda ibanga lakuqala wawusizwa abazali bethi:

“Sekungcono sebezakuyagcinwa ngamatitshala abo.”

Lababalisi babethi nxa besiya emakolitshini ukuyafundela ukuba ngababalisi, babekhetha ukufundela umsebenzi lo besazi ukuthi impilo yabo yonke izaba ngeyokweluleka, ukufundisa kunye lokuthanda abafundi.

Ubuhle bonke lobu bukhanya sebanyamalala nanku phela sekukanengi siloba emaphephandabeni ububi umbalisi abenze umfundi kumbe njalo ukudelela abafundi abakwenza ababalisi ngoba besazi mhlophe ukuthi abazali babo bazabasekela. Kukanengi sifunda ngokuhlukuluzwa kwabafundi ngabanye abafundi. 

Sabala njalo ngombalisi weCollen Bawn okubikwa wahlukuluza wamithisa umfundi owenza ibanga likaGrade 7. Kulabafundi njalo abangamantombazana besinye isikolo esiseMacheke okubikwa labo bebehlukuluzwa ngababalisi babo.

Kambe kungabe kusitshoni konke lokhu? Silethemba lokuthi abazali abanengi bayazibuza ukuthi pho kuyaphetha ngani nanku phela isikolo asiseyilokhu esasiyikho khona eminyakeni.

Kuyadanisa ukucabanga ukuthi lapho okuzaphelela khona ingxabangxoza le akusoze kube ngitsho lokukodwa okuhle.

Kukanti-ke kuhle ukuba uhlupho lolu luphange luqondiswe khathesi ukuze izikolo zingaguquki zipheke abafundi ukuthi babengobhinya, lamasela.

Abasahloniphi abafundi ngitsho lanxa umuntu wemzini efikile akusindaba zalutho kibo ukuthi bamthethise ngenhlamba. 

Ababalisi labo abaselathando ngitsho, kambe kulokuqondisa okungenza umbalisi atshaye umfundi aze amdabule indlebe, ambambe iganyavu . . . ngeke sakubalisa sakuqeda.

Akusamangalisi ukuthola umntwana obesidla amabhuku ebhuqa abanye ezithwala esesikolo njalo ekubanga laphansi.

Akumangalisi njalo ukubona okungumfundi okusanda kuqalisa ibanga lakuqala kumfundo yaphezulu kubuya kuwadlile amabele.

Abanye ababalisi sebengabanatha labafundi kungabi ndabazalutho. Zona ezothando sezibuzwa kubabalisi kunye labafundi, kambe ngubani ongabe esakusola lokhu nanku phela izikolo sezaguquka.

Ngilethemba sonke siyakubona okwenzakalayo njalo akusinto esingayithabela siyitshayele izandla. 

Umlandu usala kubani lobani, kungabe kungumbalisi, umphathisikolo, umfundi kumbe umzali ukuthi silungisise ubuhle bezikolo bubuyele kulokhu obabuvele buyikho khona.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds