uMthunywa
ABANTWANA bezikolo kumele bafundiswe kabanzi ngendlela okumele baziphathe ngayo empilweni ukuze babe lekusasa enhle hatshi ukuthi bazitshaphaze isikhathi singakafiki.
Ziyavalwa kuviki ezayo izikolo, abantwana bayabe sebetshona ezitaladeni besiya le lale amabhuku sebewaphosele le khatshana. Abanye babo bacina bekhomba amadoda amadala ngoba befuna imali yalokhu lalokhuyana. Amadoda la kawabaniki imali leyo kuphelele khonapho, bafuna imbadalo okwenza inengi labo licine lizithwala abanye njalo bacine sebenindwe lemikhuhlane ethelelwana emacansini engelaphekiyo.
Lokhu kuyisitshengiselo esibi ngakho abazali kumele batshele abantwana iqiniso ukuthi kulemikhuhlane hatshi ukubafihlela baze bacine sebegula.
Ungakhangela isikhathi esesiphila kiso siyavuma ukuba umzali axoxisane lomntanakhe ngendaba zemacansini hatshi ukwenza njengakudala ukuthi wawungeke uxoxe lomzali wakho ngendaba zemacansini ngoba umkhuhlane lo wawungavamanga.
Abazali balomlandu omkhulu wokuthi bazifundisele abantwana ngekhaya njalo kumele bakhuthaze abantwana ukuba bayehlowa igazi nsuku zonke ukwenzela ukuthi bangahlaselwa yimikhuhlane.
Abadala bathi isigogo sigoqwa sisemanzi ngakho kubalulekile ukuba umzali munye ngamunye azilayele umntanakhe ngekhaya hatshi ukuba alaywe ngumakhelwane ngoba elakho ukumfundisela eceleni.
Akuqondanga ukuthi umzali endise umntanakhe engakaqedi isikolo ngoba esezithwele, kumele amkhuthaze ukuba nxa umntwana angakhula kumele abuyele esikolo ngoba imfundo iqakathekile empilweni yalamuhla.
Kuyadanisa njalo ukuthi bakhona abanye abazali abayibo abaphosela abantwababo phakathi kwemijibila etshiyeneyo ngoba befuna umkhandlo wokudla. Kuviki ephelileyo iphephandaba likazulu belimumethe udaba lukantombazana oleminyaka engu-13 owendiselwa endodeni eleminyaka engu-28 njalo engaphilanga kuhle engqondweni.
Kudaba lolu kuvele ukuthi uyise womntwanalo wathengisa umntanakhe ngoba efuna inotho yenkomo nje kuphela. Umkhuba wokwendisa abantwana bebancane kawufuneki ngitsho empilweni yalamhlanje, kumele uphele du.
Izenzo zabobaba abafana lalaba yizo njalo ezenza abantwana abangamantombazana bacine bebona angathi kuyinto enhle ukuthandana lamaxhegu.
Ababalisi labo kuyadingeka ukuthi ezikolo ezehlukeneyo bafundise abantwana ngokuqakatheka kokuzigqaja ngemizimba yabo ukuze bangacini bewela phakathi.
Kumele bafundiswe ukuba ukugijima kayisikho kufika ngoba esikhathini esinengi bacina bengasafiki lapho abafuna ukuya khona ngenxa yokuba sebezithwele.
