uMthunywa
Kuqakathekile ukuthi abazali banakekele kuhle abantwana ezindlini. Kulabo abagcina abantwana ezindlini zokondla kuhle labo bahlale bebakhangele ngaso sonke isikhathi.
Lokhu kungenxa yokuthi umntwana kacabangi njengomuntu omdala, okuyingozi yena kakuboni kuyingozi.
Kuyadanisa ukuthi abantu bacine sebebuthene bekhala ngenxa yesehlakalo esingabe sithe senzakala ebesilakho ukuthi sivikeleke kalula.
Kuyingozi-ke ukuthi abadala baphume edlini batshiye abantwana bebodwa. Balakho ukusala bedlalisa izinto eziyingozi ezinjengengqamu, umlilo, umuthi lokunye okunjalo kukanti njalo balakho ukusala bevakatshelwa yizigangi.
Abadala bazakuthi bethi bayafika bathole umntwana mhlawumbe usengogijinyiswa yisisu kumbe ngosekhala ngobuhlungu obuthize obusemzimbeni wakhe. Awusoze ubekwazi-ke wena mzali ukuthi kuyini okungabe kubangele lokhu.
Kuyafana lakunhlanganiso ezondla intandane, umntwana uvele uthanda ukubambabamba yonke into.
Kungakho-ke nxa abadala bephuma bangabe besiyavakatsha kumbe besiyakwenza umsebenzi othize kuhle batshiye umuntu osekhulile ukuba abe yilihlo ebantwaneni.
Okunye osekusenza kube yingozi enkulu kakhulu ukutshiya abantwana bebodwa yikuthi sekulezikliwi ezihlala zilindele ukwenza okubi.
Umntwana ulakho ukuthunjwa kumbe njalo ukubanjwa iganyavu atshiywe eselomkhuhlane.
Yebo kwesinye isikhathi lezi ngozi zenzakala kungela ukuthi besingazivikela njani kodwa-ke kuqakathekile ukuthi nxa ikhona indlela esingazivikela ngayo sizame ngazo zonke indlela.
Impilo yabantwana elizweni lakithi isisengozini enkulu kakhulu ngoba phela abantu bebakhahlameza besazi kamhlophe ukuthi akula lapho umntwana angagijimela khona.
Abanye ngababamba abantwana iganyavu bethi batshelwa zinyanga ukuthi benze lokhu ukuze basile kuthi abanye bethi bebedakiwe, kodwa okusalayo yikuthi bayabe benze ulunya olukhulu kakhulu.
Ngithemba siyisifiso somuntu wonke lapha elizweni ukuthi abomthetho bajezise izikliwi lezi ngendlela ebuhlungu kakhulu ukwenzela ukuthi abanye abantu bafundele kuzo.
Zikhona njalo ezinye izigangi ezithi loba zenze isihluku kungane ezithile zitshone zibaleka kuthi abangane bazo bazincedisa ukubaleka.
Kuqakathekile ukuthi izikliwi eziphatheke kulo umsebenzi omubi kangaka zihlale zisazi ukuthi akulaqili elake lazikhotha emhlane. Kuzakuba lilanga elilodwa zwi lapha abazabanjwa khona.
Kuyingqobe yawo wonke umuntu eyokubona ukuthi bonke abephula amalungelo abantwana bayamiswa phambi komthethwandaba nanku phela umntwana ngowomuntu wonke njalo uthembele kithi ukuba simvikele kulezi izigebenga.
