uMthunywa
KUHLE ukukhula emdenini usazi ukuthi uhlala labantu abakuthandayo njalo abazakusekela kuyo yonke into oyenzayo empilweni. Umntwana nxa ekhula, ukhula esazi lokhu njalo kuletha injabulo ukwazi ukuthi uyingxenye yexuku labantu elibizwa ngokuthi ngumdeni.
Kulezinsuku impilo isithe yaguquka ngendlela emangalisayo. Abantu abaselakho ukwezwana lokhuya okwakukhona kudala. Sekusiba lezitha phakathi kwezimuli. Abantu abasafiselani okuhle ezimuluni njalo akuseyinto ethokozisayo ukubona umfowenu ephumelela empilweni ngoba umuntu uyabe ecabanga ukuthi ubumpofu bakhe sebuyakhanya emphakathini.
Kubuhlungu konke lokhu. Angithi abantu bosendo lunye kumele kube ngabantu banye okutsho ukuthi ukuphumelela kwesihlobo sakho yikuphumelela kwakho. Inzondano le isiletha udlakela emizini etshiyeneyo lokhu kufakazwa zindaba zokubulalana lokulimazana ezimulini esizibala emaphephandabeni mihla lemihla. Sekusenzakala yonke inyakanyaka ezimulini ngenxa yokungahloniphani lokuswelakala kothando.
Kuyadanisa ukuthi abantu esibethembileyo sithi ngabakithi yibo abantu asebesizwisa ubuhlungu besidlwengula, besigwaza, besihlukuluza lakho konke ongakucabanga.
Umuntu okuthiwa ngubaba akasakwazi ukuphatha umama kuhle endlini umtshaya mihla lemihla. Kwezinye izimuli uthola umuntu kuthiwa usengene entolongweni ngoba ubulele umfowabo.
Kule iviki sike samumatha indaba ebuhlungu yenye indoda yeMarange esabelweni seManicaland edingwa ngamapholisa kulandela ukugeca abantwabayo ababili, umkayo kunye loyisezala ngebhemba okubangele ukuthi abantwana bedlule emhlabeni.
Indoda le kubikwa yenza lokhu ngoba izondele ukuthi umkayo wafulathela umuzi wabo kukanti babenze isifungo sikasofa silahlane.
Kule iviki silenye njalo indaba yendoda ebulele umalumayo andubana ipheke izitho zakhe. Lokhu kuhlasimulisa umzimba, kusukumise inwele kuphinde kusitshiye silemibuzo eminengi emakhanda. Owakuqala ngowokuthi kambe undoda lo othethe umphefumulo wabantwabakhe ubengenwe yini? Kuyini okumenze wakhohlwa ukuthi ulimaza igazi lakhe njalo ulakho ukuzisola na, kwelalamuhla?
Kambe yini engabe ingene ekhanda lomuntu aze aphakamise isandla sakhe alimaze kumbe abulale umntanakhe. Uyabe uzonde okunganani okungabangela ukuthi enze ihlazo elingaka.
Angithi amapholisa ahlala ekhuluma ngendaba zokuthi kumqoka ukuthi ababili bangazithola bephakathi kokungezwani baphange badinge usizo emuntwini ongabacebisa ngokungenziwa ukuze kwephulwe ulaka olungabangela udlakela.
Kuyesabeka ukuzwa ngokuthi umuntu usebulele abantwabakhe loba isihlobo sakhe. Okumele sikwenze yikufunda ukuzibamba lokungaqakathekisi imizwa yenzondo. Akuqakathekanga ukuzonda kwakho kungakho-ke akumelanga ukwekelele ngoba kungabangela ukuthi ucine usuthethe imphefumulo yabantu obathandayo.
