uMthunywa
KULABANYE bethu abazitshela ukuthi ukuthatha isithupha akulancendo bengazi ukuthi kulilungelo lomuntu wonke ukuthi abe lencwadi le.
Kwesinye isikhathi ubezwa njalo besithi bayehluleka ukuthola izithupha lencwadi zokuzalwa, bebalisa izizatho ezingazwakaliyo.
Lanxa uHulumende lenhlanganiso ezizimele zodwa zikhankasa ngohlelo lokukhuthaza uzulu ukuthi ayethatha izithupha abhalise ukuvota, uthola kulezizalwane ezigoqa izandla.
Kuminyaka edluleyo, minengi imikhankaso ebinxusa abantu ukuthi bathathe izithupha mahala. Uhlelo lolu luqhutshwe lwaze lwengezwa ngoba uHulumende engafuni ukutshiya ngitsho loyedwa.
Uhlala egcizelela uMongameli welizwe uEmmerson Mnangagwa ngokuthi uHulumende wakhe kafuni ukuthi kube lendawo esalela emuva. Ngalokhu ukutholiswa kwezithupha kwafika kuzo zonke indawo.
Lo othi kazange abone abantu abathathisa izithupha lapho ahlala ukhona uyabe eqamba amanga.
Ukuba lesithupha yikho phela okwenza ube lamalungelo okuvota. Ilungelo lokuvota livikelwe kusisekelo sombuso welizwe.
Yingakho lathi kuphephandaba likazulu sinxusa wonke umuntu ukuthi akhuthalele ukusebenzisa ilungelo leli.
Lasemaphandleni akade avalelwa phandle kwezengqubekela phambili, ugatsha olubona ngokutholiswa kwabantu incwadi zokuzalwa kunye lezithupha lufikile.
Nantu uhlelo lokubhalisa ukuvota luvuliwe mhlaka 12 Mbimbitho lusiyaphethwa mhlaka 21 Mbimbitho. Kunsuku lezi, kuzathathwa izithupha kuphindwe kubhaliswe ukuvota.
Lolu luhlelo lokucina andubana isizwe siphatheke kukhetho lokuvotela uMongameli, amalunga enkundla yePhalamende, osenetha lamakhansila.
Uzulu ucetshiswa ukuba asukumele phezulu ngoba nanti ithuba lokucina lokuba lencwadi eziqondileyo ngoba ngalezi insuku amahola okusebenza emawofisini la ayengezwa.
Kungumbono wephephandaba likazulu ukuthi abasakhulayo kumele bafundiswe ngokuqakatheka kokuba lezithupha.
Esinye isizatho esenza abantu badonsele emuva kunhlelo zelizwe ezinje, yikuthi abafundiswa. Akuqale khathesi ukuthi lawe nxa ungumzali khuthaza umntanakho ayethatha isithupha nxa wasilahla. Njengoba uHulumende esitsho, akulamuntu okumele asalele emuva njalo akulandawo ezavalelwa phandle.
Asambeni siyethatha izithupha, sibhalise lokuvota. Kulilungelo lethu sonke.
