uMthunywa
SIPHAKATHI komkhankaso wokuqeda ukumemetheka kodlame kwabesifazane oqalise mhlaka 25 Lwezi kusiya kumhlaka 10 Mpalakazi.
Kuyavela ukuthi udlame ezimulini lukhona ngokwanda kwamacala okuhlukunyezwa kwabomama lokudlwengulwa kwabantwana. Isiminengi imikhankaso mayelana lehlazo leli eselinamathele umphakathi, sekuhlala kuyisimaye maye ezindlini.
Omama lamankazana badlwengulwa batshiywe belemikhuhlane ethelelwana emacansini abantu bengazivikelanga. Lolu ludlame oluphindiweyo njalo kubuyisela muva imizamo kaHulumende yokwehlisa isilinganiso sabantu abaphila legcikwane lengculazi.
iNational Aids Council
Ngokunjalo, njengoba siphakathi kwalumkhankaso wokuqeda udlame, siyakhunjuzwa njalo ukuthi lamuhla mhlaka 1 Mpalakazi, lilanga leWorld Aids Day.
Inhlanganiso yeNational AIDS Council (Nac) ihlala iletha imikhankaso efundisa uzulu ngendlela udlame kwabesifazane olubangela ngayo imikhuhlane yocansi. Ucwaningo olwaphawulwa yiZimbabwe National HIV and Aids Strategic Plan 2021-2025, iveza ukuba udlame kwabesifazane luhamba phambili kundlela umkhuhlane wengculazi omemetheka ngayo.
Yingakho lonyaka iNac isebenza lezinye inhlanganiso, ibike ukuba izaqhubeka iqinisa indlela zokwabela umphakathi ulwazi ngokwenqabela udlame. Baqhubeka njalo bekhankasa ngokuqiniswa kwendlela zokuvikela igcikwane, ukuqeda ubandlululo lokuqeda ukuhlukunyezwa kwabesifazane labantwana.
Ososayensi labodokotela balokufakazi obunengi bokuthi udlame ngobulili, ikakhulu kwabesifazane luyengeza imbangela kwabanye, yokuthola iHIV.
Phela owesifazana ohlukunyezwayo uyehluleka ukuzimela kumbe ukuzikhulumela. Pho nxa kuyiwa emacansini uzakuthini nxa umkakhe engafuni ukusebenzisa ikhondomu?
Ukuqeda udlame kwabesifazane ukuze bakhululeke basebenzise amalungelo abo, kumqoka lasemkhankasweni yokulwisa iHIV le-Aids.
Lonyaka indikimba yeWorld Aids Day ifana leyomnyaka odluleyo ethi: Equalise. Indikimba le igxile ekuthini kumele kulinganiswe amathuba ekutholeni ulwazi lokuphakanyiswa, ukuzwisisana, ukuvula amathuba lokuhlonipha amalungelo oluntu.
Kukho konke lokhu kusobala ukuthi ngesikhathi siqinela ukuqeda udlame, kumele sihlose lokulinganisa amathuba okuthi abesifazane bavikeleke ku-HIV le Aids.
Ngaphandle kokuxwayisa ngokulinganisa amathuba abesifazane, kungumbono kaMthunywa ukuthi abantu abahlolwe behlale besazi isimo sabo segcikwane leHIV.
Kubalulekile njalo ukuthi sandise ulwazi ngeminye imikhuhlane ebalisa ufuba (TB) lezinye izifo ezithelelwana emacansini kunye lemvukuzane.
Kungwalo ezimumethe ngezempilakahle ikakhulu kumkhankaso weHIV le-Aids, ukwazi mayelana ngakho konke lokhu kuzasiza ukuthi isizwe seZimbabwe siphumelele ekufinyeleleni umgomo wokuqeda ukumemetheka kwegcikwane leli kusiya kumnyaka ka-2030.
Kulokhu uHulumende uzimisele.
One Stop Centre
Iphephandaba likazulu likhuthaza ukuthi abantu abasukumele phezulu balwise udlame. KoBulawayo ikhona iOne Stop Centre okuyindawo lapho abahlukuluziweyo abathola khona usizo.
Abantu abahlukumezekileyo bandise ukwesaba ukuyadinga uncedo, lalapho edlwenguliwe, uyaze abonakale ngokugula.
UMthunywa uthanda njalo ukucebisa ukuthi senqabele ukubukela abantu behlukumezana ngoba lokho yikho okwenza abanye bacine besiba legunya lokuhlala bephakamisa isifo lesi sokuhlukumezana.
Asiphakameni siyehlolwa njalo igcikwane lengculazi. Singakhohlwa ukusebenzisa zonke indlela zokuzivikela.
