uMthunywa
KULEZI insuku sekwejayelekile ukuzwa ukuthi kulomuntu obulele omunye ngoba besuke baxabana kumbe njalo ukuthi kulabantu abagqekeze esitolo loba ebhanga. Lezi zindaba ezidanisayo ezenzakala kwelakithi. Akusapheli iviki kungabanga lesehlakalo esithithibalisa imizimba yabantu.
Umuntu usuka azibuze ukuthi pho sekusuke kwathini abantu sebeguquke baba yizilo emini kaBhadakazi nje.
Abantu badala amacala la besazi kamhlophe ukuthi bazakuyapika entolongweni njalo besazi kamhlophe ukuthi lokhu abakwenzayo kuyazila.
Okudanisa kakhulu yikuba abantu abanengi sebethi bangezwa indaba ezinjengalezi bamane baduduzane ngamanga bathi, “Ngumumo welizwe”.
Ngeqiniso impilo isinzima njalo ukuthola ukudla sekulukhuni kodwa phela lokhu akusitikiti lokuthi abantu baphile ngendlela yobukliwi kunye lokungahloniphani.
Kanti kuyini okubi ngokuthi usebenzele imali yakho kulokuthi uyetshontshela ovela yiginqela inyanga yonke.
Uthola abantu asekade besidla amabele bethwalelane ubhulo kungela lahlupho oluyangaphi.
Amadoda ayiwo amele aqondise abasakhulayo aziphatha butshapha ephila impilo enyanyekayo, begqekeza behlomile, bekhuluma inkalakatha yenhlamba emphakathini.
Pho abasakhulayo bazafunda kubani nxa thina abazali sesiphenduke izilo. Bayatsho phela abadala ukuthi udiwo lufuze imbiza. Umntwana angeke aba lesimilo esibukekayo yena ekhuliswe ebona abantu bezondana bengelathando.
Inhlonipho yiyo yodwa zwi indlela esingalwisa ngayo bonke ubunzima nanku phela nxa sihloniphana silakho ukuhlala phansi sikhulumisane sibonisane ngesingakwenza.
Kutshiyene, nxa kulomuntu othi yena ungumaqhuzu, owazi konke, kusuka kubenzima ukuthi umuntu onjalo azehlise ahloniphe abanye.
Okuqakathekileyo kuye umuntu onjalo yikwenza lokhu okuthabisa yena. Lokhu kusuka kudale njalo inzondano phakathi kwabantu abamele babambane izandla babe banye.
Uthola umuntu eyihulula inhlamba emphakathini, kuthi abangane bakhe abamkhonzayo bephethe bemhlekelela.
Abanye njalo uthola behlezi belixukwana bekhanda icebo lokuhlukuluza umuntu.
Uthola njalo umuntu emise ikhanda phambi kukamantshi echasisa ukuthi kungani ebulele umuntu kumbe embambe iganyavu.
Phela inengi labantu laba ababulala abanye liyabe liqale ukuziphilisa impilo le lisakhula okokuthi ngabe bathola ongabaxwayisa abaqondise isimo ngabe abadalanga amacala angako. Bayatsho phela abadala ukuthi sigoqwa sisemanzi.
Kungakho-ke kuzingqobe zikabani lobani ukuthi akhangele isihlobo kunye lomngane wakhe ongabe ephila impilo engalunganga azame ngazo zonke indlela ukumlaya.
Kungumlandu kabani lobani njalo ukuthi sizinuke amakhwapha sithathe iqiniso lokuba lokhu esikwenza kwabanye yikho esingathanda ukuthi labo bakwenze kithi kwelakusasa.
Lokhu kuzakwenza ukuthi siphile impilo ejabulisayo hatshi emsebenzini yethu kuphela kodwa lasemizini yethu.
