uMthunywa
UHULUMENDE wekethisa imithetho ayeyibekile yokulwisa ukumemetheka komkhuhlane weCovid-19 ebikhona kusukela ekuqaleni kwenyanga kaZibandlela.
Ngesikhathi uMongameli welizwe esethula ukuba uzulu usevunyelwa ukuhamba engelancwadi, umbiko lo wamukelwa ngezandla zombili ngumphakathi.
Loba uHulumende wenza isinqumo lesi ngoba enanzelele ukuthi inani labantu abahanqwa ngumkhuhlane weCovid-19 kunye labafayo selehlile elizweni, lokhu kwakungatsho ukuthi umkhuhlane lo kawusekho.
Lezinsuku khona ngenxa yokuba abantu sebeqalile ukunikwa amajekiseni okuvikela umkhuhlane lo sokungathi umuthi lo kuthiwe yiwo owelapha isifo lesi kanti hatshi.
Ukuyekethiswa kwemithetho akutsho ngitsho ukuba uzulu sekumele enze umathanda ngokwekela ukuzivikela kugcikwane leli.
Impi yokulwisa iCovid-19 isesekhona, loba inani labantu abahanqwa ngumkhuhlane lo lisehla.
Njengoba uHulumende esenza imizamo yokuthi ilizwe lithole imithi yokuvikela abantu kumkhuhlane lo kuyadingeka njalo ukuba abantu bahambe bayehlatshwa ijekiseni le hatshi ukuba besabele khatshana ngoba yiyo kuphela indlela engasiza abantu kubhubhane lolu osolubulele abantu abanengi emhlabeni jikelele.
Abantu siqhubekela phambili sibakhuthaza ukuthi bagqoke izaheke zabo emphakathini kumbe nxa besuka emakhaya abo ngoba umkhuhlane lo usesekhona elizweni.
Kuyadingeka njalo ukuthi uzulu aqhubekele phambili elandela imithetho ebekiweyo yokulwisa ukumemetheka komkhuhlane lo.
Ukuqhamuka kwesibili kwegcikwane le-corona-virus ngenyanga kaZibandlela lonyaka kumele kuhlale kuyisifundo esikhulu futhi kube yisikhumbuzo sokuba lokhu kwabangelwa yikuyekethisa okwaba khona nyakenye ngekhefu leKhisimusi lomnyaka omutsha. Kungakho-ke lokhu akumelanga kwenzakale futhi ngoba abadala bathi ukubona kanye yikubona kabili okutsho ukuba ukuze singaphindi sibhekane lohlupho lokuqhamuka kwehlandla lesithathu leCovid-19 kumele abantu baqhubeke belandela izixwayiso zababona ngezempilakahle ngoba kakho ongaziyo ukuthi umkhuhlane lo usubangele indubo ezehlukeneyo elizweni lonke kunye lasemhlabeni wonke jikelele.
Kungakho akudingakali ngitsho ukuthi abantu babanjwe ngamandla ukuthi bagqoke izaheke zabo kumbe okunye okumele kulandelwe ukuze kulwiswe ubhubhane lolu. Lokhu sikutsho ngoba uzulu angekela ukulandela izixwayiso, inani labahanqwa lubhubhane lolu lingaqansa kucine kubangela ukufa kwabantu.
Kubalulekile ukuthi uzulu ahlale esazi inhlupho zonke ezibangelwe ngumkhuhlane lo nxa belandela imithetho ekhona yokuzama ukuvikela ukumemetheka kwawo.
Okokucina asikhumbuleni ukuthi inani labahanqwa ngumkhuhlane lo lingavele likhwele futhi, uHulumende akukho angakwenza ngaphandle kokuthi abeke imithetho eqinileyo yokuvimba abantu emakhaya njengoba odokotela besitsho ukuba ihlandla lesithathu lomkhuhlane lo lingaba yingozi ephindiweyo.
