uMthunywa
INHLONIPHO iyinto enhle njalo emqoka kwabasakhulayo ukuze umuntu akhule elesithunzi phakathi komphakathi. IBhayibhili lalo liyatsho ukuthi hlonipha uyihlo lonyoko ukuze insuku zakho zande emhlabeni.
Lo yiwo wodwa umthetho eBhayibhilini olesithembiso okuveza sobala ukuthi kubaluleke kanganani ukuhlonipha abazali.
Iphathwa ithiweni mahlabezulu indaba yokuthi abafana abancane bazibike ebantwini abadala abaphose balingane labonina. Esintwini yizo izinto ezibizwa kuthiwa ziyazila njalo ekadeni kwakuthi kungenzakala into ezilayo abantu babizwe bahlaliswe phansi kuzilwe kuphinde njalo kuxoliswe kwabaphansi. Labo abakholwa isiKhristu kungenzakala into efanayo labo bayakhuleka babike eNkosini bacele ukuthethelelwa.
Kuyethusa ukwazi ukuthi abafanyana abancane basithatha ngaphi isibindi sokwenza ihlazo elinjalo? Kambe umuntu uzibika athini emuntwini omdala? Kambe Mthwakazi inhlonipho kwabasakhulayo seyaya ngaphi kumbe ngithi sebengenwe yini abantwana? Abantwana badinga ukuthi bafundiswe imbeko yithi abazali babo.
Kuqakathekile ukuthi thina njengabazali sikhulisele abantwana bethu eNkosini ngoba iBhayibhili lithi nxa ungamkhulisela eNkosini ngeke aphambuke kuleyondlela akhuliswe ngayo ebukekayo.
Ibhayibheli. Umfanekiso uthethwe ku dreamstime
Liyatsho njalo iBhayibhili ukuthi “vumelani abantwana baze kimi ngoba umbuso wezulu ungowabo”. Abantwana kufanele sibavumele bahambe emasontweni bayefundiswa ngokuziphatha kahle. Kambe angawubona athini umbuso wezulu umntwana nxa esenza ihlazo elinje?
Indaba yokukhombisa akusindaba encinyane njalo umuntu lomuntu ulezinga akhangelelwe ukuthi nxa edinga uthando adinge kilo. Yebo kambe lezinsuku labesifazana labo sebeganga njalo ngokuthandana labantwana abalingana labantwababo uzwe besithi uthando kalulaminyaka.
Kusobala ukuthi indlela abazali abakhulisa ngayo abantwana khathesi ayilabuntu yikho phela umuntu esiba lesibindi sokuthi akhombise umuntu omkhulu okwedlula unina omzalayo.
Umntwana okhuliswe ngembeko langenhlonipho uyakwazi ukuthi ongangonina ngunina kuthi ongangoyise laye nguyise okutsho ukuthi nxa engenelisi ukuhlonipha umuntu ongangonina kutsho ukuthi lonina omzalayo angeke enelisa ukuthi amhloniphe.
Kambe Mthwakazi kungabe kusitsho ukuthi abafanyana laba bacabanga ukuthi izalukazi abazikhombisayo zakhula zaze zaba leminyaka engako zingakaze zithande kumbe zithandwe? Izenzo lezi zitsho ukuba abafana abanengi bagcwele izibozi emakhanda.
Kungumlandu wethu njengabazali ukuthi sibone ukuthi abantwabethu bakhula ngendlela engasoze isikhiphe ubuntu bethu. Kambe lamuhla abazali babafana abenza lokhu bayangekela ngaphi lapho abahlala khona? Ngileqiniso ukuthi lapho abahamba khona bazizwa belulazekile.
