uMthunywa
UKUSEBENZISA umgwaqo kaLuveve Road koBulawayo sekutshayisa abatshayeli ngamakhanda. Lalabo abagada imitshova sebekhala bengaqedi ngalumgwaqo.
Umgwaqo lo, obugcwele amagodi waqala ukulungiswa ngoZibandlela. Sekuphele inyanga ezine kulokhe kugejwa. Kubikwa omanjinela bekhansili yakoBulawayo bathwele nzima ukuqedisa umsebenzi ngoba bekhalaza ngokuthi bathi begebha bathola ukuthi kulamanzi agobhozayo.
Umgwaqo lo ulungiswa ngemali ephezulu kwe- US$1,2 million.
Isiqephu somgwaqo esigejiweyo ngesidlula esilindelweni samabhasi aya emaphandleni ese-Renkini. Kulenkalakatha yamagodi asegejiwe njalo izimota eziphuma edolobheni ziqonde emalokitshi sezihamba nzima, ziphambana ngendlela elakho ukudala ingozi.
Okubuhlungu kulokhu yikuthi sekuthatha isikhathi eside ukudlula kulindawo. Ekuseni uyathola abatshayeli sebezondile, bebambe amakhanda kukhanya ukuthi kabajabuli ngitsho.
Ngaphandle kwabatshayeli, abantu abazihambela ngezabo inyawo basengozini. Khona ukuchapha isiqephu somgwaqo lesi sekuyingozi. Amagodi la asekhona alakho ukuthi alimaze abantwana abadlalela eduzane, besuka elokitshini leMakokoba laseNguboyenja.
Endaweni yokuthi ikhansili igombolozele amagodi la, yona ikhetha ukutshiya imitshina yayo nje.
Nxa ihola lesine emini litshaya, izisebenzi zayo zikhipha amawovorosi, cala celeni ziqonde emakhaya.
Osekudida ingqondo yikuthi ikhansili, ngobungcitshi bayo kumsebenzi wabomanjinela isiqambele izakhamizi amanga. Ekuqaleni yathembisa ukuthi umgwaqo uzaphela mhlaka 7 Nkwenkwezi. Kumalanga adluleyo sizwe okunye futhi.
Isikhulumi sekhansili uNkosikazi Nesisa Mpofu uphume kumaphephandaba ebika ukuba kuzadonsa isikhathi kulumsebenzi.
“Kukhanya ukugobhoza kwamanzi besekulesikhathi eside, singakunanzeleli.”
Kuyavela ukuthi ikhansili yekethisa umsebenzi wayo kulokhu. Kungumbono wephephandaba likazulu ukuba omanjinela bomgwaqo lo bazise izakhamizi ngokwenzakalayo. Umgwaqo ngokazulu hatshi ikhansili, njalo ulungiswa ngemali yezakhamizi zedolobheni lakoBulawayo. Ukukhuluma iqiniso ngokwenzakalayo kuyasiza ekuthini abantu bengacabangeli ikhansili okungayisikho. Kulenkulumo esimemetheka emitshoveni lapho abantu asebecabangela ukuba ikhansili yenza ngabomu ngoba ilinde isikhathi sokhetho. Lokhu kuvela ekuthini zinengi inhlelo zekhansili ezingaphelanga ngoba sekungenele ipolitiki.
Abanye bathi ikhansili iqinela ukuxotshanisa abathengisa ezitaladeni, ikhohlwa ngomsebenzi omkhulu wokulungisa imigwaqo lokunikeza abantu amanzi.
Kwehlula kuphurojekithi yeGodini Mall. Laphezulu le eMatshobana, umgwaqo wavalwa kungaziwa lokuthi uzavulwa nini. Konke lokhu ikhansili ithule ngakho, ayifuni ukucacisa ngokwenzakalayo.
Inkuthazo yethu iyakubomanjinela labokhansila. Sicela lenze umsebenzi ngendlela ezajabulisa abantu, kube lokwethembana phakathi wekhansili labahlali bedolobho.
Phela sesajwayela ukuqanjelwa amanga zinhlanganiso ezisebenzela uzulu. Ukuthembana akusekho.
Akwaziwe njalo ukuba ukuphuza ukulungisa umgwaqo kuzadala lokuthi abatshayeli bakhalaze ngokufa kwezimota zabo.
Ngesikhathi usiyaphela umgwaqo lo, kuzabe sekulenkinga kweminye futhi. Umkhuba wokuthi izisebenzi zekhansili zitshone zitshaye amangqetshane kumele uphele.
