uMthunywa
IZAKHAMIZI zelokitshini leCowdray Park koBulawayo kumele zibonge inguquko esikhona ngokwakhiwa kwekilinika, nanko seziphela izikhalazo zokuswela usizo kwezempilakahle kulindawo.
Ukwakhiwa kwekilinika le kuyisibonelo sokuthi uHulumende okhokhelwa nguMongameli uEmmerson Mnangagwa ukhuluma esenza.
Njengelokitshi elikhulu kulawo wonke koBulawayo, iCowdray Park ibisilela kwezempilakahle. Iminyaka yonke le lokhe lasungulwa leli ilokitshi, isakhiwo lesi ngesakuqala.
UMongameli welizwe uMnangagwa
Endaweni yokuthi abantu bahambe imango eyedlula amakhilomitha alitshumi bedinga odokotela, khathesi sekulula. Odokotela labongikazi sebeseduzane.
Ikilinika le kubikwa ilakho ukugcina izigulane ezilaliswa kuyo ezingamatshumi amabili. Kusakhiwo lesi, kule-Ward yabantwana, eyabomama abazithweleyo lamanye ehlukaniswe ngemikhuhlane thile edinga usizo lwaphezulu.
UMthunywa uzwe ngokuthaba ukuthi uHulumende wakhe ikilinika le esebenzisa imali ephuma kuhlelo lwe-devolution njalo encedisana lenye inkampani yeNgilandi ngaphansi kwesikhwama se-US$30 miliyoni.
Kubikwa ikilinika le izanceda abantu abedlula i70 000.
Inani labantu laba belithwele nzima nxa belidinga ezempilakahle. Kwabanye bekuyikugada umtshova besiya esibhedlela seMpilo kumbe e-United Bulawayo Hospitals.
Sekuphelile konke lokhu. Ziyacaca inhlelo zikaHulumende zokusebenzelana lamankampani azimele wodwa lokufuqa i-devolution.
Ukuza kwekilinika yeCowdray Park ngemva kweminyaka kuveza ukuba uHulumende kaqambi manga nxa esithi akulamuntu ozasalela emuva njalo akulandawo engasoke ibe lengqubekela phambili.
Kuyaziwa ukuthi izakhamizi zeCowdray Park zasezilahle imbeleko, zisithi akusoke kwaba lekilinika kweyabo indawo.
Iphephandaba likazulu kuliviki lincoma uHulumende ngokusebenzela uzulu, angithi yiwo umsebenzi kaHulumende lo owokuphakamisa impilo zabantu. Ilokitshi leCowdray Park seliguquke libheke elakusasa elihle.
Njengokuphawulwa kwe-National Development Strategy (NDS-1), uHulumende ukubeka mgceke ukuthi indawo ezifana leCowdray Park, ezasalela emuva, kumele ziphakanyiswe. Uhlelo lwe-NDS-1 lubeka ukwakhiwa kwamakilinika, imigwaqo, ezikolo lezibhedlela njengensika yokuphumelela kwesizwe kusiya fika umnyaka ka-2030.
Ikilinika yeCowdray Park
Ngokunjalo, izizalwane zakuleli azikholwe ukuthi ukwakhiwa kwamakilinika lokunye, njengalokhu esikubona eCowdary Park, kuphendla impilo enhle kwelakusasa lapho abantu abazenelisa ukuphila impilo engcono njalo.
Ikilinika yeCowdray Park kubikwa ifana xathu lesibhedlela ngokubika kukaMnumzana Tendai Gadzi omunye wezikhulu zenkampani yeNMS Infrastructure Limited Zimbabwe, eyiyo esebenzelana loHulumende ekwakheni ikilinika le.
“Ngempela, impahla elapho ngeyezinga lasesibhedlela Yikho sibiza indawo le lezinye ezakhiwa kwezinye indawo ngokuthi ngama-health centres, hatshi amakilinika nje. Kukhona konke ongakuthola ezibhedlela ezinkulu, kutsho uMnu Gadzi ekhuluma lentatheli yephephandaba le-Chronicle ngoMvulo.
Ukhansila weCowdray Park uKidwell Mujuru utshele uMthunywa ukuba ikilinika le izakhulula izakhamizi.
“Siphila labomakhelwane abakhupha inkulungwane zemali bedinga usizo. Abanye ngabatshitshela ezibhedlela ezikhatshana edolobheni.
“Nxa sekuqedwe ikilinika le, bazathola ukuphumula ngoba odokotela sebeseduzane.”
Iphephandaba likazulu litshayela uHulumende ngomsebenzi omuhle lo. Kuyikukholwa kwethu ukuthi izakhamizi zeCowdray Park zizasebenzisa isakhiwo lesi kakuhle ukuze ikilinika le iphathise imuli ezinengi.
