uMthunywa
UKUZITHWALA kwabantwana abasafundayo ezikolo sekwandile njalo sekubhidlize ikusasa labo. Abafundi abakusibanga esiphansi sebephitsheka ngokuya emacansini, okudala ukuthi bazithwale bengalungiselelanga.
Izikolo zivaliwe okwamanje, abantwana basekhefini. Kulelikhefu kukhona okwenziwa ngabantwana besithele, abazali bengazi lutho.
Abantwana besikolo sebengena kwezocansi. Leli liqiniso esingeke salilandula ngoba ubufakazi balokhu bukhona njalo busegcekeni. Kusukela nyakenye isimo sibe sibi okuphindiweyo kulandela ukufika kobhubhane lweCovid-19 olwabangela ukuthi abantwana bahlale isikhathi eside bengayi ezikolo kuzanywa ukuba kwenqatshelwe ukumemetheka komkhuhlane lo.
Abacubunguli bezempilakahle baphawule ukuthi isabelo seMatabeleland South silenani labantwana abanengi abatshiya isikolo ngenxa yokuzithwala kukanti abanye bekela isikolo ngoba besithi zikhatshana.
Ngemva kokuvulwa kwezikolo ngoMbimbitho lonyaka kwaphuma indaba zokuthi kulabantwana abehluleke ukuqhubekela phambili ngesikolo ngoba sebezithwele. Kambe kudalwa yini lokhu?
Ngokudingisisa kwephephandaba likazulu, kutholakale ukuthi abantwana baswela imfundiso eyiyo emakhaya. Nxa kuyisikhathi sekhefu phela kumele abazali kumbe lo ogcine umntwana kube ngumlandu wakhe ukukhuza lowo mntwana kanye lokumeluleka ngezocansi.
Loba singeke sithi abantwana bahlukuluzwa emacansini ngabantu abadala, sekwandile ukuthi amankazana akusibanga sika-fomu 4 lo 6 bathandane lamadoda aleminyaka yokuzalwa engaphezulu.
Amantombazana kumele ahlaliswe phansi afundiswe ngokuziphatha ngoba ukugijima kayisikho kufika.
Abazali bangatshayi inja befihla umphini umntwana kumele alazi iqiniso ngezothando. Kambe kuzamelelwa ubani ukuthi acebise abantwana nxa sebethe baqala ukugijimisa ezothando?
Indlela yakudala yokumelela obabakazi labomalume ayisekho. Umzali oseduzane kakhuze umntwana izinto zingakonakali. Bakhona abatshayeli bemitshova, omalayitsha labomakhelwane abakhombisa abantwana labo bathatheke bakhohlwe ukuthi kulezi insuku impilo isilukhuni ngoba sekulemikhuhlane eminengi ethelelwana emacansini.
Kungumbono kaMthunywa ukuthi abantwana bezikolo sebezenza abakhulileyo ngokugqoka i-fashion eveza imzimba phandle. Sekunzima ukwehlukanisa umntwana wesikolo lomuntu omdala.
Kubalulekile ukuthi abazali bakhangelisise indlela abantwababo abangamankazana abagqoka ngayo nxa bevakatsha kumbe bephuma ekhaya.
Zingabakhona inhlangothi ezithi umntwana ulelungelo lokugqoka akufunayo kodwa singakhohlwa ukuthi lomphakathi ufuna inhlonipho.
Kungasetshenzwa ngokubambana, abantwana bazakhuzwa ngumuntu wonke. Kungaba kuhle ukuthi loHulumende afake isinqumo sokuthi ebhawa okuzatholakala kuthengiselwa umntwana utshwala ivalwe ngoba kuyaziwa ukuthi abantwana akuvunyelwa ukuthi bathengiselwe utshwala.
Kumalanga lokusetshenziswa kwezidakamizwa sokwandile phakathi kwabatsha. Okwenzakala nxa sebedakiwe kwaziwa yibo kodwa kusobala ukuthi nxa sebenjalo bacina besiya lasemacansini.
Kungakhangelisiswa kakuhle, konke lokhu kudalwa yikusilela kwemfundiso. Abafundisi bokholo abafuni lakuzwa ngenkulumo yezocansi enkonzweni, kuthi abazali bona sebetshiyela ababalisi ezikolo.
Imfundiso yobubi bokugijimela ezocansi ayifundiswe izwakale ezikolo ikakhulu emankazaneni.
