uMthunywa
UMUNTU munye ngamunye nxa ephuma esikolo uphuma elezifiso ezinengi ngempilo yakhe ikakhulu nxa sekusiza ekuziphiliseni okungumhlobo womsebenzi afisa ukuwenza empilweni yakhe.
Ukungena ekolitshini yisikhathi esiqakathekileyo empilweni yomuntu nanko phela usuka akhethe ukuthi uzasebenza msebenzi bani okutsho ukuthi lokhu kumele akwenze ngonanzelelo hlezi akhale kwelakusasa esezibona esephakathi komsebenzi angawuthandiyo.
Kungakho-ke kungumlandu wakhe wonke umuntu ukuthi ngesikhathi ekhetha umsebenzi azawuqeqetshela enze lokhu ngonanzelelo ngoba phela lokhu kuzakuba yingxenye eqakathekileyo empilweni yakhe.
Ekadeni abantu bebengena imisebenzi ngenxa yokuthi ibivele isezinhliziyweni zabo njalo beyithakazelela kodwa kulezinsuku kukhanya abantu sebehugwa nje yimali kuphela mhlawumbe bangena imisebenzi ngenxa yokuswela okunye okokwenza.
Kudala kwakusaziwa ukuthi ababalisi bangena umsebenzi ngoba kuyinto abayikhwabithayo. Kwakunjalo kuzo zonke ingatsha, uthola abantu besebenza ngenhliziyo zabo zonke kodwa lamuhla akusenjalo.
Phela umsebenzi wakho kumele ube ngumsebenzi okutshiya usuthisekile hatshi ngemali oyiholayo nje kuphela kodwa ngazo zonke indlela. Kumele uthi uvuka ekuseni uvuke ujabula ukuthi ususiyakwenza into oyithandayo hatshi ukuvuka udanile sikhathi sonke okungabangela ukuthi ungaphathi abantu osebenza labo kuhle.
Kuliviki impumela yabafundi bogwalo lwesine kubanga laphezulu iphumile kukanti labo abakugwalo lwesithupha isilamaviki phose amabili iphumile. Ukuphuma kwempumela le kutsho ukuthi abafundi ndawonye labazali babo kumele benze izinqumo ezimqoka ngemisebenzi abafisa ukuyenza kwelakusasa.
Kubalulekile njalo ukuthi abazali banike abantwababo ithuba lokuthi bazikhethele imisebenzi abafisa ukuyenza hatshi ukuthi ngoba yena wehluleka ukwenza umsebenzi othile sefisa ukuthi lowo msebenzi wenziwe ngumntwana ukuze asuthiseke.
Asinikeni abantwana ithuba lokuthi bacabangisise ngalokho abakufisayo, thina okwethu njengabazali kube nje yikubacebisa ukuthi kumele bakhethe umsebenzi abazawujabulela impilo yabo yonke ngoba phela emsebenzini kulapho abantu abachitha khona isikhathi eside sempilo zabo.
Ayikho into ebuhlungu njengokuthi umntwana akhale ngomzali impilo yakhe yonke ngoba esefundele umsebenzi angawuthandiyo njalo angelamfutho lawo. Wonke umuntu kumele athande umsebenzi wakhe njalo alangazelele ukuya khona loba kumele aphumule.
Kumqoka-ke mahlabezulu ukuthi sithande imisebenzi yethu siyenze ngobunono. Asikucabangisiseni lokhu.
