Fungai Muderere
IMIDLALO yenkezo yeChibuku iyaqala loba nini kuligi yeCastle Lager nanko abaqoqi benkezo bazaqhuba ukhetho lwamaqula amaqembu eHarare lamuhla.
Umncintiswano lo ukhangelelwe ukuthi uqale mhlaka 9 Ncwabakazi, njalo amaqembu amane asadalala esemsileni welogu yiwo azavula inkundla, edlala kusigaba sama- play-offs. Amabili azanqoba, azahlangana lamanye alitshumi lane ku-Round of 16.
Amaqembu aphezulu kwenombolo yesitshiya galombili kungalane yeCastle Lager, ngemva kwemidlalo elitshumi lasikhombisa azadlala ekhaya kumidlalo yakuqala. Intshantshu zanyakenye kwaba yiDynamos eyanqoba iNgezi Platinum 2-1 enkundleni yeBaobab. Kwaba yikunqoba okwayifanelayo iDynamos nanko kusukela ngelanga lakuqala yayiwabhuqa amaqembu.
INgezi Platinum kayizange itshengisele ukuzimisela. Ukunqoba inkezo yeChibuku kunikeza ithuba lokuyancintisa kuConfederation Cup yenhlanganiso yeConfederation of African Football. INgezi Platinum yaba yintshantshu ngesizini ka2016.
Kumdlalo wanyakenye, iDeMbare yavuka ulaka ngesigaba sesibili somdlalo, yabhoboza umambule ngamabhola ahlohlwa ngu-Elton Chikona lo-Emmanuel Paga. Abafana beHarare basebeqede iminyaka eyisitshiya galolunye bengathwali ngitsho inkezo.
Bacina ukunuka inkezo beqeqetshwa nguCalisto Pasuwa. Lonyaka iDeMbare izabe ikumqhudelwano weCaf Confederations Cup. INgezi Platinum yona njengentshantshu zeligi, idlala kuCaf Champions League.
Ngesikhathi bethwala inkezo yeChibuku Super, iDeMbare yayithakazelela iminyaka engamatshumi ayisithupha yasungulwa.
