uMthunywa
Ethel Ncube
KULOMBALISI wesikolo seSobukhazi High School koBulawayo owetheswa icala lokudlwengula omunye umfundi okuForm 3 esikolo.
Kubikwa ukuba umbalisi lo, uJefter Chenjerai oleminyaka engu-35 yokuzalwa ohlala eNguboyenja, waqala ukuhlukuluza umfundi lo esikolo, ngenyanga kaNhlolanja kwaze kwavela kuyonale inyanga.
Kuvele ukuba umbalisi lo ngesikhathi eqala ukudlwengula umfundi lo wamnika amabhuku wathi kawase ehofisini yakhe ukuze ayewathwebula, wafika wamvalela phakathi wamdlwengula kanye andubana amlaye ukuthi angatsheli muntu ngesenzo lesi.
Kuhlandla lesibili umbalisi lo wahlangana lomfundi ofanayo elomngane wakhe wathi omunye ayemkhela amanzi empopini yena wasala lomfundi lo wamvalela ehofisini wambamba ngamandla wamdlwengula.
Isikolo se Sobukhazi
Kubikwa ekuphendukeni wezwa umngane wakhe ekhala ngapha umnyango ukhiywe phakathi wathi uvulwa wamtshela ukuba udlwengulwe ngumbalisi lo njalo phezu kwetafula kwakulegazi.
Umbalisi lo kubikwa wethusela umamangala lomngane wakhe ukuba bangakhuluma kukhona azabenza khona.
Umfundi waze wananzelelwa ngunina esebona sokulenguquko ekuziphatheni kwakhe wasembuzisisa waveza ukuba wadlwengulwa kane amalanga ehlukeneyo ngumbalisi lo, yikho ukuyabikela amapholisa.
UMthunywa uxhumane lesikhulumi samapholisa koBulawayo uInspector Abednico Ncube oveze ukuba indaba enjalo ifikile kubo.
U-Inspector Abednico Ncube
“Sichwayisisa udaba lombalisi obambe iganyavu umfundi oleminyaka engu-15 okwamahlandla amane. Sikhuthaza ukuba umuntu angadlwengulwa abikele amapholisa kungakedluli amahola angu-72. Abantu abadala yibo esikhangelele ukuba bavikele abantwana kodwa yibo abasuka badale amacala la,” kuphetha uInsp Ncube.
