uMthunywa
Thokozile Mbedzi
KULOMBALISI wesinye isikolo sakoBulawayo obanjwe igcikwane leCovid 19 kumaviki amabili edluleyo, uMthunywa uyakuveza lokhu lamhlanje.
Umbalisi lo, kubikwa ufundisa oGrade 7 kwesinye isikolo esisemalokitshini njalo kucatshangelwa ukuba uke wabakhona esikolo nanko phela uMthunywa uzwe udletshana lokuthi ngesikhathi ebanjwa umkhuhlane lo ubefundisa abafundi ukudweba ama-scanner sheets.
UMthunywa uxhumane lo Education Director Communication Services uMnumzana Tawungana Blessings Ndoro ovumileyo ukuba kulombalisi ohlaselwe ngumkhuhlane we-Covid 19 koBulawayo.
“Kulombalisi oveze ukuthi kenelisi ukuza emsebenzini otholakale elomkhuhlane we-Covid 19 njalo ulandela izinqumo zabezempilakahle.
“Umbalisi lo ngeke abe yingozi kubafundi loba kwabanye ababalisi ngoba ubengayi esikolo,” kuchaza uMnu Ndoro.
Kusenjalo idolobho lakoBulawayo yilo elihamba phambili ngokuba labantu abanengi abahlaselwe ngumkhuhlane we-Covid-19 nanko phela khathesi kulabantu abangu-123 abalomkhuhlane lo.
Kulabantu abangu-52 asebebulewe ngumkhuhlane lo esabelweni lesi njalo abangu-18 babhubhe kumaviki amabili edluleyo.
Ku-log sheet yekhansili ekhitshwa maviki onke, phakathi kwamalokitshi angu-25 alabantu abalomkhuhlane lo, kukhanya abangu-27 bahlala enzikini yedolobho, abangu-7 baseMpopoma kuthi abathathu baseNtumbane. Amanye amalokitshi ahamba phambili ngokuba yinziki yomkhuhlane weCovid-19 yi-Cowdray Park, Magwegwe, Njube, Bradefield kanye leMakhandeni. Amanye amalokitshi ahlaselweyo agoqela i-Ilanda lapho okulomuntu oyedwa owafayo, Barbourfields, eMgwanini, Lobengula, Mzilikazi, Nketa, Hillside kanye leMontrose zonke ezilomuntu munye olomkhuhlane lo.
UMqondisi wezeMpilakahle kuKhansili yakoBulawayo uDokotela Edwin Sibanda uthe abantu sebeyekethisa ukulandela izixwayiso zabezempilakahle.
“Ukukhuphuka kwenani labantu asebebanjwe iCovid-19 koBulawayo kukabili, kubangelwa yikulandelela kwabeziphuthumayo labo abake bathintana lasebebanjwe umkhuhlane okuyikho okukhangelelwe ngumthetho lo.
“Okwesibili kulokuyekethisa ekulandeleni izixwayiso zokuvikela ukumemetheka komkhuhlane lo, ukuhlangana kwabantu sokuqalisile emadilini kanye lezimfeni njalo lokhu kulakho ukungezelela inani labantu abahlaselwa ngumkhuhlane lo,” kutsho uDkt Sibanda.
Omele uMphathi omkhulu esibhedlela seMpilo uSikhwicamfundo uSolwayo Ngwenya uthe abanye abantu bafa belokhu belindele impumela yokuhlolwa abayabe bekwenziwe okutshengisa ukuthi iCovid-19 isisabalele lapho esihlala khona.
“Kulabantu abalethwa lapha sebefile kukanti abanye bafela esibhedlela belinde impumela yabo lokhu sekusethusa. Ngilovalo lokuthi kungenzakala ukuthi abantu abanengi bangabe sebethelelekile umkhuhlane lo kodwa bengakwazi, lokhu kutshengisa ukuthi umkhuhlane lo uyamemetheka emakhaya kodwa abantu sebeyekethisile,” kutsho uSikhwicamfundo uNgwenya.
