Uncategorized

Umaquphula qhuphu egumeni kulimale ingane

18 Feb, 2021 - 00:02 0 Views
Umaquphula qhuphu egumeni kulimale ingane

uMthunywa

Thokozile Mbedzi lo Nkosilathi Sibanda
ABANTWANA abathathu basele bengasela nyawo lezandla kulandela ukudutshukelwa ngumaquphula phakathi kweguma esiqintini seTemani eHwange.

Kubikwa abantwana laba kade bedlala bebane besehlelwa yingozi le kodwa omunye kazange alimale.

Abantwana abalimeleyo ababili baleminyaka eyisithupha kuthi oyedwa uleminyaka eyisikhombisa. Kubikwa owokuqala uhle waqunywa unyawo, omunye waqunywa isandla kukanti owesithathu ulimele umhlubulo wesandleni sokudla.

Ukudubuka kukamaquphula bekungokokuqala kulindawo, ngokutsho kwezakhamizi.

Lokhu kwenzakale phakathi kwaliviki lapho okuzwakale ukuba umaquphula udubuke ngesikhathi abantwana laba bedlala phakathi komuzi kaSiphilisiwe Mathema.

Iphephandaba likazulu lizwe ukuba abantwana laba babezidlalela njengensukwini egumeni baze behlelwe ngamashwa la. UMthunywa uzwe njalo ukuthi umaquphula lo udubuke kusibanga esingaba ngamamitha amathathu usuka emnkulwini.

Omunye umfakazi oqotho okhulume loMthunywa uthe bezwa kulento edubukayo efana lombhobho njalo lomkhosi wabantwana abakhalayo bagijima bayalapho okwakuvelela khona umkhosi bathola abantwana sebelimele.

“Sezwa umsindo ongathi ngowombhobho sagijima siqonda koMathema sathola abantwana sebevele sebethe wathalala phansi sebelimele ngapha behlaba umkhosi.

“Abantwana kukhanya babezidlalela njengensukwini egumeni,” kutsho umfakazi lo ongathandanga ukuqanjwa ngebizo.

“Abantwana bathi babona angathi lucingo basebedonsa kwasekudubuka bathelwa yinhlabathi bahle balimala
Isikhulumi samapholisa esabelweni seMatabeleland North u-Inspector Gloria Banda uthe:

“Udaba silutholile. Sicebisa abazali ukuthi bananzelele abantwana, babafundise ukuthi bangabambi insimbi ikakhulu endaweni ezake zafakwa omaquphula khona.

“Ibutho lesizwe lizakuyahlolisisa loludaba,” kuphetha isikhulumi samapholisa.

Share This:

Sponsored Links