uMthunywa
YiNtatheli kaMthunywa
ULIZWE Sweswe umsekeli kamqeqeqtshi wengqwele zikanobhutshuzwayo we-Castle Lager iFC Platinum umanzi te ngokuthwala inkezo kabili njalo uthe sebephange behlisa injabulo ngenxa yomqhudelwano we-Total Caf Champions League.
Umqeqetshi lo uthe abafuni ukuphazamisa inhloso yabo yokuthi bedlale ngcono kulalokho abakwenza nyakenye kulumqhudelwano odibanisa intshantshu zamaligi iAfrica yonke.
USweswe owazakala kabanzi ngomsebenzi omuhle awenza kuqembu leTsholotsho ngokulifikisa kuPremier Soccer League, uxoxe lalintatheli ngamalungiselelo abo anduba bayedibana leqembu leCnaps lase-Madagascar mhlaka 27.
“Siyalungiselela sibili njalo asitshiyi lutho emuva. Abadlali bethu sesilabo, sikhangelele ukuqala ukulolonga ngoMvulo.
“Asethuki lutho ukuyancintisa kuChampions League ngoba lathi siliqembu elesatshwayo,” kutsho umqeqetshi lo.
Uthe ukuncintisa kuCaf Champions League akutsho ukuba bazayekethisa ukwenza kuhle kuligi yakuleli.
“Sifuna ukuqina ngamandla kulisizini. Siyazi ukuba kungumthwalo ukudlala kumaligi amabili.
“Lonyaka sizadlala inguqu engcono ngoba sihlose ukuqeda sizintshantshu futhi. Iphupho lethu ngelokuthi siphatheke kumidlalo yenkezo ekholiswa ngamathimu aqeda isizini ephezulu. Siyithimu enkulu, angeke kusehlule lokhu.”
Iqembu leli lidlale kakuhle kusukela laqala ukuncintisa kuligi ephakemeyo kuleli. Phose kumasizini amathathu ibiqeda ikunombolo yesibili kumbe eyesithathu.
Ngokuqhatshwa kukamqeqetshi uNorman Mapeza loSweswe, iFC Platinum ikhuphukile yatshintsha umdlalo, okuyikhona okuyincedise ukuthi ithwale inkezo.
Iqula leFC Platinum elizagijima kuTotal Caf Champions League: Petros Mhari, Wallace Magalane, Francis Tizayi, Raphael Muduviwa, Jameson Mukombwe, Elvis Moyo, Kelvin Moyo, William Sitima, Gift Bello, Lawrence Mhlanga, Ian Nekati. Farai Madhanhanga, Winston Mhango, Never Tigere, Kelvin Madzongwe, Marshall Mudehwe, Rahman Kutsanzira, Rodwell Chinyengetere, Ali Sadiki, Ranson Pavari, Devon Chafa.
Forwards: Mkhokheli Dube, Gift Mbweti, Albert Eonde, Charles Sibanda, Lameck Nhamo, Thomas Chideu.
