‘Umangoye uzitshayela umlozwi ezindlini’

05 Aug, 2021 - 00:08 0 Views
‘Umangoye uzitshayela umlozwi ezindlini’

uMthunywa

YiNtatheli kaMthunywa
ABAKHALI bayabubula abadlali bemidlalo etshiyeneyo kuwo wonke amaqembu kuleli ngokuswela usekelo lokuthi baqhube impilo zabo ngesikhathi umdlalo umisiwe.

Sekuqede phose inyanga ezintathu imidlalo ivaliwe kuvikelwa ukumemetheka kwegcikwane leCovid-19. Ukumiswa kwemidlalo lokhu sekubangele ukuthi abadlali bahlale bevule izandla becela imali, ukudla lempahla yokugqoka.

Kubesobala ukulamba kwabadlali kuqembu likanobhutshuzwayo iHighlanders icela omasitanda ukuthi bengaxotshi abadlali balo ezindlini.

Abadlali beTshilamoya ababhadali imali yokubhaxiswa ngoba abaholi. Ngomnyaka odluleyo ithimu le kulesikhathi lapho ebiholisa khona abadlali inyama, impuphu lokunye okungaphathisa ekugcineni imuli zabo.

Kuyafana lakwamanye amaqembu kulumdlalo kodwa isimo sibi kumaqembu aligiqa kumaligi aphansi. Lakhathesi iphephandaba likazulu alikatholisisi ukuthi amaqembu aku-Division One aphila njani. Mhlawumbe asedilikile ngoba kwehlula ukuthi abhadale imfanelo yokudlala.

Kuyavela ukuthi ngalesi isikhathi, bonke abaphila ngezemidlalo kuleli kuzamele bathole usizo ngamadokotela ukuze benelise ukwamukela ukuthi impilo zabo seziguqulwe yisimo esilethwe yi-Covid 19.

Abadlali sebetshonela ukuhlala ezindlini, okuyinto engajwayelekiyo, ngitsho lakubo “lova” abangelamsebenzi.

UMthunywa ngempelaviki edluleyo uxoxisane labadlali abathile kunguqu, netball, basketball lethenisi ababike ukuba impilo isiguqukile.

“Impilo ayisafani. Singabe silokhe sisithi singabadlali kodwa lobungcitshi bethu buyaphela ngoba sitshona sihleli phansi. Akula okunye esikwaziyo ngaphandle kokudlala,” kutsho omunye wabadlali beBosso othe engaqanjwa.

UNicole Mthunzi ongumdlali we-netball uthe kuzakuba nzima ukuthi abuyele emdlalweni.

“Ngingumama wabantwana ababili. Bengiphila kulumdlalo ngalokho ebengikuthola kodwa nxa sekunje kunzima.

Inkokheli zethu zithule okutshengisa ukuthi lazo azilakho ezingasinikeza khona. Angiboni ngiphenduka la,” kutsho lumdlali obetshibilika kuRainbow Amateur Netball League.

Kungumbono wabezempilakahle ukuthi ukutshintsha kwempilo kanje kubangela ukuthi umuntu azibone esephansi.

UDokotela Mercy Mthombeni oyigcitshi kuhlangothi lwe-psychocology koBulawayo uthe kubalulekile ukuthi amaqembu ezemidlalo ancedise ukuthi abadlali bathole usizo, ikakhulu ukukhuthazwa ukuthi bengacabangi nzima.

“I-Lockdown le ebuye leCovid-19 isidale inkinga empilweni zabantu. Kuqakathekile ukukhangelwa isimo sengqondo ngenxa yalumkhuhlane weCovid-19. Labadlali kumdlalo etshiyeneyo bakhathazekile.

“Sikhuthaza bona abadlali ngokwabo ukuthi badinge usekelo kulabo abaseduzane. Siyenelisa ukuxoxa labo siphathisane,” kutsho uDkt Mthombeni.

Ukudinga usizo lwabodokotela be-psychology kungabe ukubiza imali enengi kodwa uDkt Mthombeni uthe usizo lwabo kuyinsika kulabo abafuna ukuqhubeka bephatheka kwezemidlalo.

Inhlanganiso yeWorld Health Organisation (WHO) kunkuthazo yalo kwabezemidlalo ithe isikhathi lesi sidinga ukuthi abantu baqinise ingqondo. “Umdlali oqinileyo kudingeka ukuthi agcine umcabango yakhe ingalahleki.

Ezemidlalo zibalisela umzimba oqinileyo lengqondo ezijulileyo, ngakho abadlali abatshisekele ukuthi babe lemcabango enhle,” kubika inhlanganiso ye-WHO ebulenjini.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds