uMthunywa
Wayne Ncube
IPHINDE yapheka imboza njalo inhlanganiso yeZifa ngokungaveli sobala ngemali okumele iphiwe abadlali bama-Warriors abaphakathi komqhudelwano we-Africa Cup of Nations.
Kuyasolisa okwenziwe yiZifa njalo akumangalisi ngoba linhlanganiso ihlala ithembisa yehluleke ukugcwalisa izethembiso. Ngesikhathi abadlali besizwe bexhaswa ngabalandeli ukuthi banqobe, kuphume imbiko enkambeni yokuthi akubonwa ngaso linye.
Iphephandaba likazulu lithole udletshana lokuba kukhumiswane umlotha kodwa kukhona okungekho endaweni yakho.
Okudida ingqondo yikuthi iZifa isihwatshe inkalakatha yencwadi izesula kudaba lwemali, igcona abantu abathile ngokuthi bahlambaza ibizo lenhlanganiso.
“Sikhathazekile ngamanga asegcwele kumabonakude asebuyisela muva umkhankaso wokudingela abadlali imali . . .,” kutsho umbiko okhitshwe yiZifa ngoLwesibili ntambama.
Kusenjalo, iqula elakhethwa ukuthi lidingele amaWarriors imali lithembisa ukukhipha imali ezifunekayo.
UKazembe Kazembe osaphethe isikhundla sikamphathi wezemidlalo wethule ukuba ngoMvulo ezinye imali ziyabe sezifakiwe emabhanga abadlali.
Uthe kufakwe imali engange US$108 000.
Ekhuluma lentatheli kaMthunywa uKazembe uthe:
“Sibathembise enye imali, sethemba bazadlala kuhle kumidlalo elandelayo.”
UKazembe, ophinda abengumgcinisihlalo wekomithi edinga imali yamaWarriors uqhubeke wathi imali le izakwengezwa kuphinde kube lebhonasi.
“Nxa bengadlala kuhle le-Uganda benqobe emdlalweni kuzaphuma enye imali ngoba lumdlalo uqakathekile ekuqhubekeleni phambili kwama-Warriors kulumncintiswano we-Africa Cup of Nations,” nguKazembe lo.
Kubikwa bekuyisicelo sabadlali ukuba iZifa ibadingele imali ezwayo ephezulu kwe $2 000 umdlali munye.
“IZifa executive committee layo ithi iqembu ngelelizwe. Iqembu lidinga ukuthi lixhaswe ukuze lalo lidlale lilethemba, lingaphanjaniswa yilutho.
“Sibonga bonke abathe ukuqhubekela phambili behalalisela iqembu lamaWarriors ukuze linqobe kule imidlalo yeAfrica,” kutsho uKazembe ebonga ukuzimisela kwabadlali kusukela kulungiselelwa umqhudelwano.
