uMthunywa
Gibson Mhaka
IKHUZA imihlolo izakhamizi zesiqintini seMpoki, eGokwe kulandela ukuthola ukuthi kulomangoye oduna owephuke waba labadlwane abathathu.
Izakhamizi zakulindawo ezingaphansi kwenduna uNemangwe zicabangela ukuthi yibuthakathi lobu. Isehlakalo lesi senzakala ekupheleni kukaNcwabakazi.
Ngokuzwa lokhu, intatheli zigijimele kulindawo zidinga ukuzwisisa, kwatholakala ukuthi ludaba olusegudwini njalo selutshwaqise imizimba yenengi labantu.
Umnikazi kamangoye lo, uGogo Catherine Makoni (90) uthe wancedisa umangoye wakhe ongumduna ukuthi ephuke ngemva kwesikhathi eside.
Uthe kwamethusa ngoba abakaze bebone imihlolo enjengale.
“Ngisethukile futhi yonke linto iyesabeka,” kutsho uGogo uMakoni.
“Siyaqala ukukubona lokhu emulini yethu lasesigabeni sethu. Ngavela ngasola ngesikhathi isisu sikamongoye lo siqala ukuba sikhulu kodwa bengingalindelanga ukuthi ephuke abe labadlwane, nanko phela umduna.
“Omunye wabadlwane wafa. Ngosuku ngibona ukuthi umangoye kahlalisekanga, esekhathele kakhulu ngabiza umalukazana wami owafika ngokuphangisa. Kuthe ngesikhathi umangoye lo esephuka, umalukazana wami wabaleka wangitshiya ngedwa. Ngemva kokwephuka, umangoye wonga, wakhothakhotha abadlwane, waze wazama ukubamunyisa,” kulandisa uGogo Makoni.
Uthe kalalwazi lokuthi yini eyabangela ukuthi umangoye wakhe omduna ephukile.
“Emva kwalokho ngesaba lokuthi ngimbulale umangoye lo. Ngamthatha labadlwane bakhe ngabagoqela ku-mosquito net, ngabalahla egangeni, kodwa okumangalisayo, ngemva kwamahola ambalwa umangoye waphenduke ekhaya. Ngasola ukuthi kukhona umuntu owalikhululayo.
UGogo Makoni uthe wazama futhi ukujikela umangoye lo esambuzini, waphenduka.
“Ngiphinde ngethuka sengimphosele e-blair toilet waphuma. Khathesi kafuni ukubona abantu futhi nxa angababona uyabaleka.”
Uthe usedinga abantu abangamsiza kulokhu.
Induna uNemangwe, uthe udaba uluzwile kodwa okwakhathesi akalaso isiqiniseko ngalo.
“Bekungakafiki ezindlebeni zami. Kodwa njengenkokheli yomdabu nxa kusenzakala okunje endaweni yami kumele ngitshelwe ukuthi kuthathwe amanyathelo bani ngokuphangisa,” kutsho induna uNemangwe.
