uMthunywa
YiNtatheli kaMthunywa
IQEMBU leligi yeCastle Lager iHighlanders selikhethe ukuthi uMandla “Lulu” Mpofu abengumqeqetshi walo kusukela kulimpelaviki.
UMpofu uthatha umsebenzi obuphethwe nguMadinda Ndlovu oseqhatshwe yiGaborone United.
Iwofisi yezokukhitshwa kwembiko kuHighlanders ithumele umbiko kuntatheli isithi uMpofu uzasekelwa nguBekithemba Ndlovu.
Bobabili bebengaphansi kukaMadinda ekuqaleni.
“Iqembu lithatha lelithuba ukwazisa umphakathi, abasekeli, abalandeli lamalunga alo ngenguquko esibekhona kubhentshi labaqeqetshi.
“Kusukela khathesi, umqondisi wabaqeqetshi nguMandla Mpofu. UBekithemba Ndlovu usengumsekeli kamqeqetshi, uTembo Tshuma uzakuba ngumqeqetshi wabonozinti, uBrian Keti uzalolonga abadlali, kuthi uVezigama Dlodlo abengumaneja wabadlali.”
IHighlanders ithe isivumelwano sokuqhatshwa kwabaqeqetshi siphela ngoZibandlela.
“Abaqeqetshi laba sibafisela okuhle,” kutsho iBosso.
Kubikwa uMadinda utshiye ngoba esehluleka ukuthi aphile impilo kamqeqetshi uqobo ngenxa yesimo somkhonomi welizwe.
Kwele-Botswana uMadinda uzahola imali ephezulu kwe-40 000 pula ngenyanga.
Kusenjalo, uMadinda usethumele umbiko wakhe evalelisa abafana.
*Umbiko kaMadinda evalelisa
“Angilitshiyanga.
Isimo selizwe asingivumeli ukuthi ngiqhubeke ngilapha. Bengifuna ukuthi ngihlale la ngize ngixotshwe.
Kubuhlungu ukulitshela ukuthi sengisiya qeqetsha kwenye indawo kusukela mhlaka 1 Ntulikazi. Sesidlule kokunengi sisonke.
Ngiyazi ukuthi lizafika phezulu, lilwele inkezo.
“Liyenelisa njalo lizakuthola. Madoda, yiyo indlela engilivalelisa ngayo,” kutsho uMadinda andubana acine ukukhuza iHighlanders ngoMvulo ekuseni.
