YiNtatheli kaMthunywa
ICINE iphumelele imizamo yomlandeli kanobhutshuzwayo waseNingizimu Afrika, uJoyce “Mama Joy” Chauke yokuya emidlalweni ye-Olympics, eParis, eFrance, ukuyasekela abadlali bakulelo.
Ukuhamba kukaMama Joy kutshiye imibuzo eminengi — yokuthi uhambe kanjani — ngemva kokuthi uMphathintambo wezeMidlalo, ubuCiko lamaSiko, uGayton McKenzie, ememezele ukuthi uyakuvala ukuhanjiswa kwabalandeli ukuyasekela amaqembu esizwe akuleli uma edlala ngaphandle.
UMama Joy unikele ekhasini lakhe le-X (Twitter) wafaka ividiyo etshengisa ingaphakathi yendizamtshina abehamba ngayo, elibangise eFrance. Ividiyo le ihambisana lombhalo othi “Mama Joy useParis, uPapa Joy nguye othathe izintambo . . . sengingumlandeli wakhe wokuqina . . . bukani ngiyazithokozisa.”
Kuzokhumbuleka ukuthi kwavela umbiko othi ugatsha lwezeMidlalo, ubuCiko lamaSiko lwakhipha i-R1,3 million ukubhadalela indleko zabalandeli uMama Joy loMnu Botha Msila ngesikhathi kulemidlalo yeNdebe yoMhlaba yombhoxo, eFrance nyakenye.
