‘UMalume’ uqinisa umgogodla kuCosafa

20 Jun, 2024 - 00:06 0 Views
‘UMalume’ uqinisa umgogodla kuCosafa

uMthunywa

Nkosilathi Sibanda

UMQEQETSHI wamaWarriors uJairos “Malume” Tapera ubike ukuba eqenjini lakhe, bakhona abakhethelwe ukuthi baqinise umgogodla weqembu nanko umqhudelwano weConfederation of South African Football Associations (Cosafa) ususondele.

UTapera uthi amaWarriors abhekane lomqanso onzima kulandela ukuyangisa ilizwe ngesikhathi lidliwa kumidlalo yomkhankaso wokuya kuWorld Cup.

Kuzamele leliqembu lenze kahle kumidlalo yeCosafa ezabe isedolobheni lePort Elizabeth, South Africa, kusukela mhlaka 26 Nhlangula kusiyafika u7 kuNtulikazi.

Sekusaziwa ukuthi iZimbabwe izadlala kuwaphi amalanga kulumncintiswano wamazwe adlala inguqu asezansi ye-Africa. AmaWarriors abuyela emqhudelwaneni lo ngemva kokukhutha iminyaka emibili ngenxa yokuvinjelwa yiFifa. Iqembu leli liku-Group B leZambia, Comoros leKenya ethathe indawo yeMalawi.

Bazaqala ukudlala lelizwe leComoros mhlaka 27 kuNhlangula enkundleni yeNelson Mandela Bay, andubana badibane leZambia mhlaka 30 eWolfson Stadium. Umdlalo wokucina kulelibanga, amaWarriors azadlala leKenya, mhlaka 2 kuNtulikazi enkundleni efanayo. Abacubunguli bomdlalo bakholwa ukuthi imidlalo ezakuba nzima kumaWarriors ngeyeZambia leKenya. Amazwe womathathu ake adibana ngenyanga kaMbimbitho kumidlalo yeFour Nations Tournament eyaqhutshelwa eMalawi.

Umqeqetshi wamaWarriors uJairos Tapera ubikele intatheli yeZimpapers Sports Hub ukuthi uzenza okusemandleni akhe ukuthi alolonge iqembu elizakwenza ngcono ukuze bajabulisa abalandeli, lokuvala amanxeba okudliwa kumidlalo edluleyo.

“Njengoba kumele sikhangele ikusasa, sibona sengathi lo ngumqhudelwano wokunikeza amathuba abadlali abasacathula, abangaphansi kweminyaka yokuzalwa engu-23. Kuzakuba lomdlali oyedwa loba ababili asebelesikhathi bedlala. Laba ngifuna bezokwakha umgogodla weqembu. Ngakho-ke, sizama ukwakha kusukela lapho.

“Kodwa labo abanye abadlali abaleminyaka engaphansi kwe-23 asebephumelele eqenjini elikhulu, ngeke babizwe ngoba sebezibonakalisile. Asikho isizatho sokuthi sibize umuntu ofana loTawanda Chirewa, kumele siphendlele abanye indlela,” kutsho uTapera ebika ngamalungiselelo akhe kuliviki.

Iqembu elizadlala kuCosafa:
Onozinti: Marley Tavaziva (Brentford), Geoffrey Chitsumba (Manica Diamonds), Prince Tafiremutsa (Dynamos).
Imvimbi: Shane Maroodza (Huddersfield), Andrew Mbeba (Highlanders), Emmanuel Jalai (Dynamos), Thubelihle Jubani (Manica Diamonds), Isheanesu Mauchi (Simba Bhora), Tawanda Chisi (Manica Diamonds).
Abadlali abasesiswini: Daniel Msendami (Jwaneng Galaxy), Joel Phuthi (Sheffield Wednesday), Juan Mutudza (FC Platinum), Kingsley Mureremba (Caps United), Mtokozisi Msebe (Simba Bhora), Tatenda Tavengwa (Venda Football Academy), Richard Hachiro (Ngezi Platinum), Panashe Mutimbanyoka (FC Platinum), Tinotenda Meke (Green Fuel).
Abagadli: Macauley Bonne (Cambridge United), Takunda Benhura (Ngezi Platinum), Tinotenda Benza (Herentals), Denzel Mapuwa (Green Fuel).

Amazwe ancintisayo:
Group A: South Africa, Mozambique, Eswatini, leBotswana.
Group B: Zambia, Comoros, Zimbabwe, le Kenya.
Group C: Angola, Namibia, Lesotho, leSeychelles.

Share This:

Sponsored Links

Survey


We value your opinion! Take a moment to complete our survey

This will close in 20 seconds