uMthunywa
YiNtatheli kaMthunywa
KULENDODA egulayo evela eSouth Africa etshiywe ngumalayitsha enzikini yedolobho lakoBulawayo, kusehlakalo esethuse inengi lezisebenzi labaphathi bezitolo nanko phela bekucatshangelwa ukuthi lindoda ingabe iphethwe ngumkhuhlane we-Covid-19.
Indoda le (esemfanekisweni), okungasatholakalanga ibizo layo, ebizikhanyela ukuthi iphathekile emzimbeni njalo ihamba nge-wheelchair, kubikwa yehlike emoteni yohlobo lwe-Toyota Quantum, elenombolo zase-South Africa phakathi kobusuku phambili kwesakhiwo esaziwa ngokuthi kuseMaponga Building.
Indawo le ikumgwaqo kaGeorge Silundika, phakathi kuka 10th lo 11th Avenue.
Iphephandaba likazulu lidobhe udletshana lokuthi indoda le ifike yacela isambuzi lokuthi inikezwe indawo yokucatshisa ikhanda isalinde izihlobo zayo.
Kuze kwasa ilindile.
Intatheli zifike kulindawo ngoLwesibili ekuseni abantu besesaba ukuthi basondele ngoba becabangela ukuthi isigulane singabe sile-coronavirus.
Amapholisa asenkambeni yeBulawayo Central afike axazulula isiphithiphithi, athwala indoda egulayo le loba kungasatholakalanga ukuthi bayisengaphi.
Omunye wabafakazi bodaba osebenza kulindawo uthe okwenze basola ngesimo sendoda le yikuthi ifike yalahlwa ngumalayitsha.
“Aah kuyethusa lokhu. Umuntu lo utshiywe ngomalayitsha ebusuku ngokuzwa kwethu. Ucele kunogada ukuthi athole indawo lapho angalinda khona izihlobo zakhe.
“Sesabe ukusondela ngoba kulezi nsuku akwaziwa ukuthi ovela eSouth Africa ugula umkhuhlane bani. Ukuza kwamapholisa yikho okwenze kwabalula ukuthi sikhululeke,” kutsho uChristabel Ncube.
Isimanga ngalundoda yikuthi usuke eSouth Africa ngesikhathi imingcele ivaliwe ngenxa yegcikwane leCovid-19.
Inengi lezigulane eziphethwe ligcikwane leli lise-South Africa. Kuleli sekuvela mihla ngemihla ukuthi ukwanda kwabantu abaphethe iCovid-19 ngabasondelelane lalabo abavela phetsheya.
