uMthunywa
Thokozile Mbedzi
KULAVUKE impi yombango phakathi kwabomakorokoza eMashava eMasvingo kubangwa igodi kanye lesimbo, okucine kubangela ukuthi kufe oyedwa.
Umuyi uLameck Ngiza oleminyaka yokuzalwa engu-32 ugwazwe wafa nguPromise “Gweja” Moyo ngoMvulo kuyonale iviki.
UMthunywa uzwe ngabafakazi abaqotho ukuthi uMoyo wafika wangena egodini laboNgiza labanye bakhe wagebha andubana asuke esegcwalise amasaka amabili.
Kubikwa uMoyo waphinda wathatha njalo lesimbo saboNgiza. Ekhuluma lentatheli kaMthunywa umfakazi oqotho uZvikomborero Mbiza uveze ukuthi uNgiza kunye labanye bakhe agebha labo bazonda ngoba uMoyo kuthiwa yinto yakhe yokuhamba egebha emagodini abanye ngoba ezenza ingqwele yegangeni.
“UGweja (uMoyo) wathi efika egodini laboNgiza wangena phakathi wazigebhela igolide. Lanxa sasiseduze sesaba ukukhuluma ngoba vele uMoyo ngumuntu othanda ukulwa. Wagebha wagcwalisa amasaka akhe ezamende amabili wawathwala lesimbo saboNgiza.
“Ekuphendukeni kwaboNgiza bevela kudla bahle bathukuthela bamlandela endlini yakhe bengu-15 bafika kwalavuka impi,” kuchaza uMnu Mbiza.
“UGweja wathi esizwa umsindo wabomakorokoza laba waphuma endlini evele esefihle ingqamu ebhulugweni. UNgiza wathi ezama ukumbuza ukuthi kungani engene egodini labo waqholoza esithi yena loba bengu-15 ngeke bamenze lutho ngoba yena uyindoda eqinileyo.
“UNgiza wasondela phansi kwakhe baqala ukutshayana ngezibhakela okwacina kusenza uGweja akhuphe ingqamu bonke belibele uNgiza wathi uyakhothama wahle wamgwaza emhlane wafela khonapho.
Kubikwa abanye bakhe bathi bebona lokhu bahle bacela ezinyaweni.
Isikhulumi samapholisa esabelweni seMasvingo uAssistant Inspector Kudakwashe Dewa ebuzwa ngaloludaba uvumile ukuthi kulabomakorokoza abalwayo kwacina kufe oyedwa.
“Udaba lwabomakorokoza okucine kusifa oyedwa lwenzakele njalo solufikile ehofisini yethu.
“UNgiza efika endlini kaMoyo wayethwele imvubu wamtshaya ngayo okuyikho okwenza uMoyo wamgwaza wahle wafela khonapho. Abafowabo bakaNgiza abane babaleka kodwa omunye wabo uChristopher waphenduka wamthwala ngemota kodwa wathi efika laye esibhedlela seGarths Mine kwathiwa usebhubhile. “Amapholisa adinga uMoyo njalo sicela abangabe belolwazi lokuthi ungaphi sicela babikele amapholisa aseduzane labo.
“Sikhuthaza njalo uzulu ukuba engahambi ethwele izikhali ngoba kubangela udlame njalo sokulicala ukutholakala ulezikhali,” kuphetha uAsst Insp Dewa.
