uMthunywa
Nkosilathi Sibanda
IZIPHOXO ezinikeza uzulu injabulo ngokuhlekisa abantu koBulawayo ngaphansi kwenhlanganiso ebizwa ngokuthi uMahlekisa, zibika ngokuthokoza ukuthi uhlelo lwabo selufikise iminyaka elitshumi.
Ukuze bathakazelele lokhu, uMahlekisa useqoqe umthimba wobunandi ozaqhutshwa mhlaka 1 Mabasa.
Omunye walezi ziphoxo, ongumqondisi walinhlanganiso uNtando Van Moyo utshele uMthunywa ukuba bekungekho lula kuhambo lwabo lokukholisisa uzulu loba nje belesibongo esikhulu ngosekelo abalutholayo kuminyaka yonke le.
UVan Moyo labanye bakhe baqala loluhlelo ngesikhathi uhlobo lokukholisisa abantu ngokubahlekisa lungakasabalali kuleli. Umahlekisa ubalelwa kunhlanganiso zakuqala ezasungula loluhlelo.
Ekusungulweni, uMahlekisa usebenze lomuyi uClive Chigubhu, encedisana lenengi elibalisa uNomsaDee, uZwe loVan Vodloza
Umqondisi lo, usedume ngokuthi ngu-Dollar Man izwe lonke ngemva kokusebenza kwakhe kumkhankaso wokunikeza imali kulabo abathenga isinkwa se-Baker’s Inn.
“Sesikhulile, asibuyeli emuva. Yinjabulo kithi sonke kuMahlekisa ukufikisa iminyaka elitshumi sisenza lokhu esikwazi ngcono, ukuhlekisa abantu,” kutsho uVan Moyo.
“Sizamile ukuqinisela kuloluhambo olungathambanga ngitsho lakancane. Loba sesifika lelibanga, sibona angathi kusekhona okunengi okumele sikwenze.”
Uthe sebenelisa ukukhulisa uhlelo lwabo lokukholisisa abantu ngokubahlekisa nanko sebasebenza labanye osaziwayo koBulawayo lakwezinye indawo.
“Siqala into le sahlosa ukuthi sivule inkundla lapho esizadibanisa iziphoxo, engingathi ngabahlekisi sifuna ukuthi umsebenzi wokuthokozisa abantu ukhule.
“Kuyo yonke iminyaka le, sinanzelele ukuthi sibe yinsika yemibono koBulawayo ngoba sihlekisa uzulu ngalokho akubona nsukuzonke okubalisa konke esikuzwa lesikubona ku-social media, inhlelo zomphakathi, umjolo, ukukhwela kwentengo yokudla, ukufa kwemigwaqo, ubugwelegwele okwenzakala emakhansilini lokunye okunengi. Siguqule indlela abantu abacabanga ngayo, sabenza bavuleka amehlo lengqondo.”
UVan Moyo uthe bazakwenza imicimbi eminengi ukuthakazelela usuku lwabo lokufikisa iminyaka elitshumi.
