Ethel Ncube
KUZATHUNQA uthuli esiqintini seSomnene, eMatabeleland South kuvulwa umuzi ngomcimbi wezomculo ozaqhunswa nguMagwaza encedisana lo-Aphiwe loSobancane ngoLwesihlanu kuliviki.
Usaziwayo kwezokuzithokozisa uDJ Mapressa kubikwa uzabe engumhlonitshwa wombuthano lo njalo kuzangenwa mahala.
Intatheli ixhumane lomaneja ka-Aphiwe loSobancane uHandsome Sibanda obike ngalumcimbi lokuthi abaculi bakhe bayajabula ngokunxuswa kumcimbi wokuvula umuzi.
Uthe ngokwakuqala ukuthi laba bobabili beqhunse loMagwaza.
u-Magwaza
“Abaculi bethu u-Aphiwe loSobancane bazabe beqala ukuthi bayetshaya ingoma zabo loMagwaza. Ukuba loMgwaza kibo kuyinto ebajabulisayo kakhulu ngoba bewuthakazelela umculo wakhe.
“Kuyinto enhle ukuba labo bahlanganyela lezikhokho zomculo ezifana loMagwaza,” kutsho uSibanda.
Uthe okwakhathesi baphakathi kwamalungiselelo omcimbi.
“Siphezu kokulungiselela. Sihlele ukuthi wonke amalungiselelo kumele aphele lamuhla.
“Sithembisa injabulo kubo bonke abazabukela umcimbi lo. Sibaphathele ubunandi bodwa. Umculo wethu ngowabantu bonke, abadala labantwana. Sithi wozani ngobunengi benu lizozibonela. Izakhala ikatali kunyikinyeke isigaba sonke.”
