uMthunywa
Ethel Ncube
UMHLABELELI othandwa ngabanengi kuleli, uMadlela Skhobokhobo usecabange ukutshintsha ukwenza nanko ubike ukuba uzakhipha ingoma entsha elomdumo weKwaito.
UMadlela, obizo lakhe lokuzalwa nguMothusi Bashimane, uthe ufuna ukusondelela bonke abajabuliswa yi-Kwaito.
Uthe ngemva kwesikhathi eside esaziwa ngokucula i-Rhumba, kulabantu abamtshela ukuthi abawuthandi lumculo, okuyikho okwadala ukuthi angene kuKwaito.
Umculi lo, owazakhela udumo njengosaziwayo kwezomculo ngengoma ethi Ngamnank’ uSaMamo uthe umculo wakhe omutsha uzatshiya abalandeli bakhe behlekelela ngoLwesithathu ngeviki elizayo ngengoma yakhe ezaphuma ilevidiyo kunkudla zonke zokuxhumana.
UMthunywa uxhumane loMadlela yena oveze kabanzi ngengoma yakhe wathi uyicule encedisana loNoluntu J, Mjox, Blue Rose loBasuthu.
“Ingoma le engiyibize ngokuthi Ama-International ngiyihlabele loNoluntu J, Mjox, Blue Rose loBasuthu, yibo engihlabele labo ingoma leyi. Ingoma ngiyihlabele ngenhloso yokuveza ukuba ithalenta silalo njalo singafika khatshana ngokuhlabela, singabahlali bakoBulawayo,” kubika uMadlela.
Abaculi abasacathula asebenze labo kulingoma uBlue Rose loBasuthu wake wahlabela labo njalo kungoma ethi
Umona eyathokozisa abanengi ngesikhathi iCovid-19 ibhahile ngomnyaka ka2021.
Uthe phezulu kwakho konke, umculo wakhe ujonge ukuthokozisa uzulu wonke.
“Ingoma le ngiyihlabelele labo abathi bona iRhumba abayithandi ngithi abakholise le engizayikhipha bayilalele kuhle izabajabulisa njalo iyahle iphume levidiyo yakhona. Abalandeli bami bazayithola ezitolo zonke ezisebulenjini ngoLwesithathu oluzayo,” kutsho uMadlela.