uMthunywa
INDODA ingafa lamhlanje, iphinde ivuke. Umutsho lo uveze ngqo isimo sikaMandla “Lulu” Mpofu owayengumqeqetshi weHighlanders okubikwa useduzane lokuthi abengumqeqetshi weqembu leNgezi Platinum Stars.
UMpofu ususwe engacabangeli kuTshilamoya, ngesikhathi ezama ukuthi ayiphakamise kodwa engazi ukuthi inkokheli zeqembu aziwuzwisisi umqondo wakhe. Endaweni yakhe wangena uBrito Baltemar oseyikumisile ithimu yezwe lonke yaba kunombolo yesithupha kungalane yeCastle Lager.
Ngemva kwenyanga ezimbalwa uMpofu engasebenzi, uMthunywa uyakuveza ukuba usehlelweni lokuphiwa umsebenzi kuNgezi Platinum. Abafakazi abaqotho abancwebe intatheli le indlebe, baveze ukuba uMpofu ubalelwa kubaqeqetshi abahamba phambili kuzifiso zenkokheli zeNgezi Platinum.
Benjani Mwaruwari
Umsebenzi kamqeqetshi weNgezi Platinum lo uvele kulandela ukuxotshwa kukaBenjani Mwaruwari ngeviki edluleyo ebaliselwa ukudliwa kweqembu lakhe kumidlalo elitshumi lantathu eqeqetsha. UMwaruwari, owaziwa ngokuthi ngu-Under Taker, uxotshwe lomsekeli wakhe uBongani Mafu, budebuduze kwamalanga iqembu limise umsebenzi uCosmas “Tsano” Zulu umqeqetshi wabonozinti.
Bobathathu laba ngadabuka koBulawayo.
Okwenza uLulu abengumqeqetshi ofaneleyo ukuphatha lumsebenzi yibungcitshi lezithupha aziphetheyo. Bambalwa abaqeqetshi abangakhuza loba yiphi ithimu elizweni abalobungcitshi obuthwele nguMpofu.
Abanye abaqeqetshi okubikwa basemehlweni eNgezi Platinum nguLuke Masomere loNation Dube. Loba iphephandaba likazulu lizame ukuxhumana lehofisi yokuphuma kwembiko kuleliqembu kuliviki, akuzange kuvele sobala ukuthi limi ngaphi ngokuqhatsha umqeqetshi.
Kumbiko wayo okhitshwe ngoLwesibili emini, ibhodi yenkokheli zeNgezi Platinum zithe okwamanje intambo zibanjwe nguTakesure Chiragwi owayencedisa uMwaruwari eloBongani Mafu.
uBongani Mafu
“Ibhodi isikhethe umsekeli kamqeqetshi uTakesure Chiragwi ukuthi aphathe umsebenzi kamqeqetshi okwakhathesi, encediswa nguKlifton Kadulira,” ngumbiko ovele kuqembu lo.
Umfakazi osebenzela iNgezi Platinum, ubikele intatheli le ukuba uMpofu nguye ongaba lenhlanhla yokukhuza iqembu.
“Usengangena uMandla nxa kungavunyelwana kumhlangano ozayo. Iqembu lidinga ukunqoba kumidlalo ezayo,” kutsho umfakazi lo ohlezi phezulu kwakho konke okwenzakala kuNgezi Platinum Stars.
“Le yindaba esegudwini. Isakhulunywa ngabadala.”
