‘ULizwe uzezwa ngokudliwa yithi’

24 Oct, 2019 - 00:10 0 Views
‘ULizwe uzezwa ngokudliwa yithi’ Lizwe Sweswe

uMthunywa

NGOMNYAKA inkezo yeChibuku Super Cup isungulwa, kwabikwa ukuba le yinkezo yokuthakazelela usekelo lwababukeli labathandi bakanobhutshuzwayo abagcwalisa inkundla zePremier Soccer League mihla yonke.

Igcwalise isithembiso sayo iPSL isekelwa yinkampani ye-Delta Beverages ngenyathelo lokuthi iHighlanders leFC Platinum zidlalele eMagumeni ngeSonto. Umdlalo wehlandla le-quarter final lo udonsa amehlo ngobukhulu bamaqembu la kunguqu yakuleli.

Ukudibana kwamaqembu la eBarbourfields kuveza ukuthi iPSL ikubonile ukuthi nxa ifuna ukuthola imali ethe xaxa, ikhaya leHighlanders yilo elilenkundla engagcwalisa abantu. Ngaphandle kwalokhu lumdlalo uzahlabusa ngoba iBosso lezimbamgodi zePure Platinum Play zidlala inguqu ehambelanayo. 

Okusemehlweni kulumdlalo yikuba khona kwabaqeqetshi abatsha kumaqembu la. Izethekeli seziqeqetshwa nguLizwe Sweswe obengumsekeli kaNorman Mapeza okweminyaka emihlanu. IHighlanders ilolongwa nguHendriek Pieter de Jongh. Abaqeqetshi laba bayaqala ukuhlangana, ngakho akula owazi omunye.

Labasekeli beBosso abakhulume lephephandaba likazulu bethe gwaqa eHighlander Sports Club kuliviki bathe ukudibana kwabaqeqetshi laba kuzajabulisa.

UPenwell Zulu oweMzilikazi uthe iHighlanders isalelwe yinkezo le kuphela kulisizini.

“Kithi kuHighlanders akusela kulwela iligi ngoba asidlalanga kuhle ekuqaleni kwesizini. Sesidanela kuyonale iChibuku.”

UJabulani “Sporo” Mkandla ubike ukuba ukudibana kukaSweswe lo de Jongh kuzaveza ukuthi nguphi umqeqetshi kuzwa phakathi kwabo.

“USweswe asikaze simbone eqeqetsha elapha eBF (Babourfields). Okuzakwenza lumdlalo ubemnandi yikuthi bobabili abaqeqetshi bayaqala ukungqikilana. Kodwa iqiniso lethemba esilalo yikuthi uLizwe uzezwa yikudliwa yithi,” kutsho umlandeli lo.

Enkambeni yeFC Platinum kubukeka kuqhuba kuhle bekhangelele uhambo lwakoBulawayo lapho uSweswe abika ukuthi kuzafiwa.

“Kumele sinqobe. Lo ngumdlalo wenkezo, kungenzeka loba yini ngemizuzu engu-90. Siyalungiselela ukuvimba lokuvula igedi ngokuhlohla,” nguSweswe lo esecingweni.

Akubizwa ozwayo eMagumeni ikakhulu kubalandeli beHighlanders asebebone iqembu labo lidonsa ngendlela yokunqoba kulezi insuku.

Nansi imidlalo yeChibuku Super Cup:

FC Platinum v Highlanders (Barbourfields Stadium), ZPC Kariba v Manica Diamonds (Vengere Stadium), Harare City v Triangle United (Postponed), Black Rhinos v Ngezi Platinum Stars (Baobab Stadium)

Share This:

Sponsored Links