Sikumbuzo Dabengwa
Lafa elihle bakwethu. Kambe kuyini esesikubona kulumhlaba wabobabamkhulu. Izolo ukudla bekuphilisa. Izolo okunathwayo bekulibazisa. Izolo okuginywayo bekusilisa. Pho lamuhla sekutheni kule intsha ezelwe izolo. Konke abakubambayo kwenza basale ingqondo zikwelinye ibanga.
Vakatsha emadolobheni. Asilakubala ukuba yiliphi. Lakuleli elakwethu kunjalo. Amajaha asephenduke amaxhegu emancane. Zindayila baba. Izisu ngamakhebece okubonisa iphango lakudala. Ukuhamba yikwenza ngoba imbuzi ezelusiweyo uzinqanda njalonje.
Kambe isizwe esizayo sophephelaphi nxa insane zonke sezicwile etshwaleni. Hatshi kambe ayisibotshwala kodwa itshefu yona ngokwayo.
Umbuzo okhona ngowokuba uluntu lolu lwenza lokhu lusazi na ngemiphumela elandela ukunatha lokudla lezizidakamizwa? Kunzima mntwana waleya ndoda.
Akesikhangele umumo lo obakhona kweminye imikhosi okwande ukuba khona abadlileyo banatha.
a) Lisemsebenzini ohloniphekayo. Libeka isihlobo senu esedlule ngengozi yomgwaqo. Abantu bathe gwaqa. Nangu umzawakho ehaluzela, ezunguzeka ukuze azengena ecaweni. Ufika akhulume santando, abantu bathe wathalala.
Ubuza imibuzo engelakho ukuphenduleka. Abantu bonke sebemuthe nhlo, ngamehlo. Babonani? Ngeke kwachasiselwana. Yithapha ngamehlo utshiye. Indlela avunule ngayo. Indlela akhuluma ngayo. Indlela aziphethe ngayo, kuyavela ukuba akusela muntu laphaya.
Imibuzo
a) Umzawakho ungenza cebo bani elingamkhulula ebugqilini asezifake kubo ngezidakamizwa?
Related Stories:
b) Abazali sebezame mizamo bani ukukhipha lumntwana kungxaki asekuyo?
c) Ngaphandle kokuzitshaphaza ngomzimba wakhe, nhlupho bani asegalule kuzo?
d) Abadala bathi indlela ikhona. Yiliphi ithemba abakulo njalo lingamsiza njani lo osethe wacwila kuzidakamizwa?
Zimbi izidakamizwa. Zikutshiya ulikhebece nxa ungabizwanga ngabokhokho bakho ukuyaphekela amaxhegu lezalukazi kogoqwanyawo.
Asekeleni impilo yokuzitshaphaza. Asibozithanda. Thanda umzimba wakho. Hlonipha umzimba wakho ukuze wandise izinsuku zakho zokuphila emhlabeni.
Asihlolisiseni konke esikwenza kusithabisa okwethutshana elincane. Kubi phandle. Vuka, phaphama.
