Ulimi lomumo ubuvila

21 Apr, 2022 - 00:04 0 Views
Ulimi lomumo ubuvila Kulandela izenzo zomntwana olivila ngokuphindiweyo

uMthunywa

Sikhumbuzo Dabengwa
UMFOKASIBANI banyana ayisibuvila, yinyoka. Wehluleka lokuzenwaya.

Le yinkulumo esijayele ukuyizwa ebadaleni kulandela izenzo zomntwana olivila ngokuphindiweyo. Ivila lelo alinyikinyeki lakancinyane ekuphileni kwalo. Kubi bafundi abahle ukuba yinyoka ngoba uyabe usenyanyisa ngezenzo zakho ezibuyisela wena labanye emuva.

Kuvamile ukuba ivila lingazazi njalo lingananzeleli ukuba lilivila. Zikhona izimpawu ezikhombisa ukuba lumuntu ulivila. Singaziqamba singaphuma logwalo oluqukethe lukhulu bafundi. Kambe yiziphi izimpawu ezijayelekileyo eziveza ubuvila?

Ubutshapha

Lolu luphawu olukhona bafundi ngoba ivila lilakho ukwekelela yonke into imane ithi hlekelele nje. Emkulwini lapha izitsha zithe ne, azigeziswanga. Kuyanuka iphunga lokubolayo selithe mu endlini lapha. Into yonke nje ayiqedakali ukuhlala kwayo. Uphose uthi kusendlini kaThekwane. Akekho esingamsola kodwa thina ngokwethu bafundi.

Umfundi wonke owenelisa ukubala uyenelisa ukwelekelela ekhaya ngokugcina izindlu emakhaya zihlanzekile.

Kulilungelo lomntwana ukuphiwa indawo yokuhlala kodwa  kungumlandu wakhe laye umntwana ukuphathisa ekuhlanzeni izindlu, ukuphathisa ekuhlanzeni izitsha, hatshi ukudla umuntu atshiye izitsha zithe hlikilili, amaphini engageziswanga, izimbiza lemiganu kudliwa yizinanakazana. Konke lokhu kuyinzalo yobuvila umuntu ebalisa esithi ngizakuthi sengilungisa.

Ukubalisa.

Siyakuthanda ukubalisa bafundi. Lolu ngolunye lwezimpawu zobuvila lapho umuntu ozwa esibalokudonda nje abesesedlulisela phambili ulutho okumele alwenze khathesi kodwa athi uzalwenza kwelizayo. Lokhu kuyasibulala bafundi ngoba imisebenzi okumele yenziwe ngesikhathi esithile, isuka ingasenziwa.

Kuluphawu lobuvila ikakhulu nxa lowo obalisayo engenzi lutho olutheni, ezihlalele nje kumbe ebamba lokhu atshiye engelakuphutsha ekwenzeni ulutho olulodwa. Kuqakathekile-ke bafundi ukungabalisi kanye lokwenza imisebenzi siyiphutshe.

Lezingwalweni zethu kuzakuba yiso leso. Kuhle-ke ukwenza imisebenzi siyiphutshe ngoba lesikolo sizahamba sibambe ziqine siphutshe, omabalisa bandise ukusala emuva.

Ukuphuza ukuvuka

Nansi esinye sezenzo abadala abasizonda okucaphulayo bafundi. Ukuphuza ukuvuka nje kungelasizatho esiqinileyo ngaphandle kokufuna ukulala nje.

Umantengwane wejayele ukuba lesivuno esihle bafundi ngoba lasendimeni yokulima ufica omantengwane sebeyitshaye bayivala indima ngokuvuka ngovivi. Lo olala ilanga lize lithi chatsha ufica abanye sebephutsha indima yokuqala.

Kuthi kunjalo uthole ukuba ilanga selitshisa akusasebenzeki ngoba seliphezulu, selihlaba elikaMlimu. Siyakhuthazana bafundi ukuba nxa siphile kuhle sifunde ukulahla ingubo sodwa.

Singabi ngamavila amelela ukuvuswa. Abakudala babengavuswa kabili njengabakhathesi. Sasingakhala isitilobho emhlane wendoda. Lokhu kwakuyisikhuthazo.

Abafundi abangasimavila abaselwa esikolo.

Ngilethemba kuzasisiza bafundi siguquke sitshiye umkhuba wokuba ngamavila voxo!

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds