uMthunywa
Sikhumbuzo Dabengwa
Siyahlangana njalo kule iviki bafundi sikhangela ngesiko lethu ikakhulu sihlola eminye imikhuba esingasayivezanga kuzifundo zethu ezadlulayo. Silethemba ziyaliphathisa .
Indlela yokukhombisa izolo.
Asikhangeleni indlela yokukhombisa kwamajaha ekadeni kwehlukile kulendlela yalamuhla. Izolo amajaha ayebona amantombazana emithimbeni. Kwathi sekusiza izinkonzo basebenzisa zona ukuba nxa ziphuma kulezo zinkonzo bazilandele ukuze baphose amazwi ezintombini zingakafiki emakhaya azo.
Emithimbeni lapha lakho kwakuthi sekuchithekwa kube lithuba elihle lokuxhuma bazibike ezintombini. Sebeke baliphosa sebezalandela-ke ngakibo lezozintombi . Amajaha ayefika kwazo izintombi azikhombisele khona.
Kwakumele ijaha lifike emini ilanga libalele. Ijaha lalifika likhuleke emzini wendoda litsho indawo lapho elivela khona. Nxa lihlakaniphile lize liqambe loyise kanye loyisemkhulu. Wayengabuzwa kanje ujaha:
“Pho lapha-ke jaha?”
Lona lithi;
“Ngiyazihambela.”
Limpendulo yayiveza obala ukuba ijaha lidinga intombi. Sebezalibizela eyinye yezintombi ukuba ilise ngasezintombini, exhibeni phela. Lalithola ithuba-ke lokuxoxa lazo izintombi kuthi nxa seziswele ingxoxo ezinye ziphume lisale litshukana layo leyontombi eliyifunayo. Lanxa kunjalo lalithi nxa selihamba ziliqhube zindawonye izintombi.
Ayisibo bonke ababevunyelwa ukukhombisa amantombazana lapha ekhaya. Abadala babelakho ukulilandulela bahle bathi:
“Hatshi mfana, abakozibani asihambelani labo”
Lapha umnini muzi uyabe eselilandulele ngakho kuhle kuphele yonke indaba. Ijaha lalingemukelwa kodwa kuthi izintombi sezisele zodwa zibuzwe zikhuzwe ngalelojaha zihle zibone ukuba labobantu abemukelwa kulelikhaya.
Lokhu kwakusiza ukuba ijaha lihle lazi ukuba liyemukelwa loba qha kulelokhaya bengakakhombani.
Abazali babenqineka ezimulini lapha. Babekhetha imizi elobuntu. Babengabathandi imizi lapho abahamba ebusuku, abathakathi phela. Babedingisisa langokuba abayisimavila yini. Kwakudingakala ukuba bazi ukuba balezifuyo ukuze benelise ukugcina umntanabo.
Indlela yokukhombisa lamuhla
Izikhathi seziguqukile. UMthwakazi akaselayo indlela ekhanyayo elandelwa ngamajaha ekukhombiseni. Sebehlangana kuzindawo ezitshiyeneyo njengasezikolweni, emakolitshini, emitshadweni, ezinkonzweni, ebulenjini lakwezinye izindawo ezitshiyeneyo.
Imfundo isingaba ngeyinye yezimbangela esibangele ukuba abazali banqineke ekukhombisaneni kwamajaha lezintombi ngoba besaphatheke kuzifundo zabo.
Abazali abasafuni lakuzwa ngokukhombisana lokho funa abantwababo baphambaniseke ezifundweni. Asikhumbule ukuba ilifa lakulezi izinsuku selisemfundweni.
Asihlanganeni kwelizayo bafundi.
