uMthunywa
Ukuzihlonipha lokuhlonipha umphakathi
Sikhumbuzo Dabengwa
Siyabingelelana njalo bafundi kule iviki. Injongo esilayo ngeyokuba sixoxisane ngezindlela esiziphatha ngazo ekuphileni kwethu. Ukuzihlonipha komuntu kudinga ukunanzelela okwenzayo okungenza omunye aphile nzima.
Sike sakhangela impilo elobutshapha, siyaqhubeka ukuze sizame ukuhlasela izinhlangothi zonke bafundi. Izikhathi ezinengi uthola ukuba abantu benza ubutshapha obedlulisileyo emphakathini kanye lasemizini yabo imbala.
Akesikhangeleni izehlakalo ezilandelayo.
Liyizakhamizi edolobheni elikhulu njalo lihlalela ekucineni kwezindlu. Sekwadaleka indlela ehamba abantu ngenyawo. Eceleni kwayo lindlela sekwadaleka indawo yokulahlela izibi.
Abantu bayeza kule indawo ngobusuku bafike balahle ingcekeza yonke ongayicabanga. Akusahambeki lula kulabo abaya emasimini abo kanye labasebenzisa lindlela bequma ukuze bayefika kwezinye izindlu ezibucwala. Ingcekeza le ayipheli ngoba lanxa abanye beyitshisa, isala isibankulu, kudalwa yikuba abantu bayalahla yonke into okugoqela amaphepha, amagajana kanye lokunye okudala ukuba lindawo ibeyisidleke sikathekwane.
Asikhuthaleni-ke bafundi ekuthini sekele lathi ukuphatheka ekulahleni izibi phandle kwamaguma ethu. Asizameni ukuqoqa kuhle izibi siziphe abekhansili, kuthi nxa sisenelisa ukuya lazo enzikini yalapho abekhansili abangazizuza lula khona kungenza impilo ibelula. Lokhu kungokunye kokuzihlonipha njalo lokuhlonipha ophila labo emphakathini, asikwemukeleni bafundi.
Kule iviki asike sizibuze imibuzo ethile ngokuziphatha kwethu. Eminye ingaba ngelandelayo –
a) Yiziphi izindlela esingazilandela ezehlisa ubutshapha ebantwini lasemagumeni ethu?
b) Kambe abatsha kungumlandu wabo na ukunanzelela ukuhlanzeka kwendawo abahlala kuzo?
c) Yibaphi abantu abamele baphatheke ekuletheni ukuhlanzeka ekuphileni kwethu?
d) Labo abangakalimuki ukulahla umkhuba wokulahla izibi kubi kwenziweni ngabo?
e) Yiziphi izindlela zokukhankasa ezingasetshenziswa ukulimukisa uzulu ngokuhlanzeka lokuzihlonipha kwaloluhlobo.
Ngilethemba sizahlolisisa izindlela esiziphatha ngazo emagumeni ethu ukuze siphile ngokuhlanzeka ngazo zonke izikhathi. Siyakudinga ukuhlanzeka emakhaya, ezikolweni kanye lasemphakathini ukuze sigweme, sizivikele kumikhuhlane ehamba lokungahlanzeki. Asihlanganeni kwelizayo bafundi.
