Ulimi lomumo…INHLONIPHO IYAQHUTSHWA

06 May, 2021 - 00:05 0 Views
Ulimi lomumo…INHLONIPHO IYAQHUTSHWA

uMthunywa

Sikhumbuzo Dabengwa
Siyahlangana njalo bafundi kuzifundo zethu zolimi lomumo sikhangela indlela esihlonipha ngayo abanye kanye langendlela esizihlonipha ngayo thina ngokwethu. Izikhathi ezinengi sithi umuntu kufanele ahloniphe abanye ikanti kusemqoka ukuba laye azihloniphe ekwenzeni izinto ezithile ekhaya kanye lasemphakathini. Ukuziphatha kuhle kuyinhlonipho enkulu kulabo ophila labo.

Oziphethe kuhle uyaxwaya impilo yobutshapha ekwenzeni lasekuphileni kwakhe ngayo yonke indlela. Itshapha lona alithandeki nxa siliqathanisa leqhathanzipho. Siyalikhuthaza-ke bafundi ukuba sihlale sihlanzekile ukuze sihloniphe impilo zethu kanye lezabanye. Asikhangeleni sihlolisise okulandelayo ngempilo yokungazihloniphi lobutshapha obejayelekileyo.

A. Uqeda ukudla isithelo sebhanana emoteni yangekhaya. Ngokungananzi uthatha ikhasi lebhanana uliphose ngefasitela cala celeni nje. Umuntu ohamba ngenyawo leli ikhasi limthwalisa amagabha avuzayo ngoba ngaphandle kokutshelela, uyawa agenquke aphose alimale nxa engaba lomnyama. Kubi bafundi lokho. Asikwekeleni ukuphosa izibi ngamafasitela siziphosela ingqe kungaphi. Asikhuzeni lalabo abasakwenza.

B. Uthunyiwe emavinkilini ekuseni kakhulu ukuba uyebamba umzila wempuphu ukuze abadala beze ilanga selikhwelile. Nguwe lowaya uvuka usithi phulukundlu engutsheni ungagezanga lobuso imbala. Nantu uhlakahla luthe ne esihlathini nanku ubukleza impisi ubusuku bonke. Omakhelwane sebekuthi jeqe, bahitshwe langumlomo onuka phu!

Kubi lokhu bafundi asikunanzeleleni. Yibutshapha lokungazihloniphi. Umuntu ophuma endlini uyageza, azihlanze anduba ayelapho athunywe khona.

C Kusendlini yokufundela, liphakathi kokufunda kodwa nangu omunye umfundi ulokhu ebambabamba isikhwama sakhe aphume lesandla sivacule inkobe, aphosele emlonyeni. Uyaqhubeka nanku umbalisi uphathekile kakhulu ngokubhala kumgwembe. Nxa ubuka iphansi ahlezi kulo sekugcwele imvuthuluka zesinkwa, amaphepha eziwiji, amakhafitha okudla okutshiyeneyo. Kungabe engayisuye yedwa.

Bakhona labanye abangelanhlonipho lezindlu zokufundela, abathanda ukuhlafuna loba yisiphi isikhathi. Kubi lokhu bafundi. Ngumkhutshana othi ungakungena uphenduke itshapha elingelanhlonipho elihamba liqala ingcekeza loba ngaphi. Asizihlonipheni bafundi. Sihloniphe lalaba abasihlanzela izindlu zokufundela, izambuzi kanye leguma lesikolo.

Ukudla akudliwe kodwa ngesikhathi esifaneleyo, endaweni efaneleyo ukuze amakhasi lokunye okudala ingcekeza kuphoselwe emagabheni adalelwe lokho. Asisabali ukungcola kwezindlu zokufundela, sibalisa lokungcola kwezingwalo zokubala lezokuloba. Asibeni lokuzikhuza lokuzithiba ekusunguleni ingcekeza ukuze ekukhuleni kwethu singabi ngabantu abangamatshapha. Phela inuku, itshapha, uyalithola lasezinkonzweni, emabhasini asikhulumi yilo elihamba phambili. Siyabonga ngokulandela lilalela izifundo zethu ezakha ubuntu bethu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds