ULIMI LOMUMO: Amazilo abephathelane lokungcwaba izolo

Salibonani bafundi. Ngithemba liyakholisa ngekhefu kodwa lingakhohlwa phela ukuthi ikhefu ayisilo lokudlala lokuvuka lilele likhohlwe nje ukuthi izingwalo zililindele. Phela lingakhohlwa ukuvula izingwalo, selingathi selivula sokumnyama tshu lingasakwazi elikufunde ngethemu elidlulileyo. Sikhangelile emuva ngemingcwabo ethile lakade kusenziwa izolo. 

Sibuye sakhangela futhi ngomehluko osukhona phakathi kwemigcwabo yalamuhla layizolo. Kunengi osokuguqukile lamhla nxa sikhangela ukufa. 

Izolo ukufa bekuhlonitshwa kakhulukazi asazi kumbe yikuthi ukufa bekungajwayelekanga njengalamuhla osokuyinsakavukela umchilo wesidwaba. Ngenxa yokuhlonitshwa kokufa izolo bekusiba lamazilo athile abelandelwa. Phambilini sike saxoxa ngomama obezithwala izinyanga. 

Besekuthi ithuba lakhe lokubeletha selifikile ehluleke ukubeletha kuhle, ingane izalwe ithule. Bekuzila ke ukuthi umama lo ofelweyo akhale ngoba phela bekuthiwa angakhala sekungenza ukuthi angasatholi inzalo impilo yakhe yonke.

Okunye obekuzila yikuthi kwenziwe isililo esikhulu angathi ngesomuntu omdala. Bekusiba nje yinto yabo gogo abaseduze lomntwana kumbe lonina lo osweleyo. Lamhla awasekho la amazilo. Elinye izilo ebelijwayelekile izolo yikuthi ngemva komngcwabo bekuzilwa ukusebenza imisebenzi efana leyemasimini. 

Abantu bebevuka nje bezihlalele ngekhaya. Elinye izilo njalo ebeliqakathekiswa ngelokuthi inina elifelwe ngumkalo kwakuzila ukuthi lilale phansi ngomhlubulo. Lokhu kwakuthiwa kuyazila nje ngoba angakwenza kwakukholwa ukuthi sekungenza abelomkhuhlane othile. 

Kanti futhi okunye njalo okwakuzila yikuthi inina leli likhale lilele phansi. Lalithi lingakwenza lokho izalukazi ezindala zimqage zimhlalise. 

Elinye njalo izilo lalingelokuxhawulana. Akusiso siNdebele sakithi ukuthi nxa kufiwe abantu baxhawulane sengathi bayakholisa, kuyazila. Kulezi insuku umuntu uyafika emfeni axhawule indlu yonke. 

Lokhu sekudalwa yikuhlangana kwemihlobo ethile osokusenza amasiko ethu axubane abantu bacine bengasazi ukuthi okuyikho okwesintwini yikuphi kodwa ke kuhle sikubambe ukuthi kuyazila ukuxhawulana emfeni ngesiko lamaNdebele.

Elinye izilo kusiko lesi Ndebele yikuhlabela lokugida emfeni. Lokhu bafundi esiNdebeleni kuyazila kakhulu ngoba iNdebele likholwa ukuthi kuhlatshelwa kumbe kugidwa nxa abantu bechelesile kumbe kusemdlalweni ngakho emfeni abantu bahlala phansi bazithobe batshengise ukudana lokuhlulukelwa. 

Kuyagidwa ezimfeni kulezi izinsuku, kuhle sibekwazi ukuthi kudalwa yikho ukuxubana kwemihlobo kodwa akusikho kwesiko lethu. Okunye njalo okwakuzila yikufaka inyama ebulawelwe imfa isawudo. Kwakumele inyama le idliwe injalo. 

Okunye njalo okwakulizilo yikudla ukudla kwemfa kungakangcwatshwa. Kwakumele kungcwatshwe kuphele yonke imicingolo abantu besebeqala ukudla. 

Zinengi ke izinguquko esezikhona eziphathelane lokufa kulezi izinsuku. Lokhu sekusenza ukuthi ukufa kungabi lesithunzi njenga kudala. Kuhle silandele isiko lethu bafundi ukuze lilondolozeke. Asihlanganeni ngeviki ezayo.