Ulimi lomumo…AMANGA – UKUTHEMBEKA

01 Jul, 2021 - 00:07 0 Views
Ulimi lomumo…AMANGA – UKUTHEMBEKA

uMthunywa

Sikhumbuzo Dabengwa
Siyahlangana njalo bafundi kule iviki. Siyaqhubeka njalo ngodaba lwethu lokukhuzana ngezenzo ezithile emphakathini. Sithe sicinana siphethe udaba olubi kakhulu emphakathini olwamanga. Yebo kambe siyavuma ukuba izikhathi ziba khona lapho umumo ucina usenza siwakhulume singahlosile. Lokhu kuyenzeka nxa sesifakwe endaweni enzima sesizama ukuzephula emalahleni.

Yilapho-ke esidinga usizo khona lokuba yiliphi inyathelo okumele silithathe ukuze siphume ebunzimeni bokuthonisiswa lokwetheswa icala. Abadala bathi iqiniso aliqedi bunini. Ngakho siyakhuthazwa ekuthini kumumo wonke sifunde ukumelana leqiniso sibe lokuthembeka.

Hlolisisa umumo olandelayo.

A) Uthunyiwe emavinkilini ukuba uyethenga isitshebo. Nangu ubaba ongamaziyo ekulanda ethi uyekupha ingane esele endlini ebucwadlana imali enganganani eyeziwiji. Abuye akuphe lawe imadlana yeziwiji ukukubonga. Ngokuhlakanipha lubaba acele ukuba akugoqelele imali yakho ngephepha ukuze ingalahleki. Wena usuka ngesiqubu uqonda kuleyondlu uyedinga umntwana oseleyo ufice kungelamuntu ngitsho loyedwa. Nxa ubuyela emavinkilini uthola ubaba lowaya engasekho, umdinge uze udele. Ekuvuleni iphepha lemali yesitshebo uthola kugoqelwe isivimbo nje lamaphepha.

Kusehlakalo lesi ungenzani
a) Ngiyabuyela ngekhaya ngiyebazisa ukuba imali isilahlekile endleleni

b) Ngiyabuyela ngekhaya ngiyebachazela konke okwenzakeleyo ukuze izenzo zabantu abanje zenqatshelwe nguzulu wonke

c) Ngiyabuyela ngekhaya ngiyebatshela ukuba ngitshontshelwe imali ngingaboni.

B) Kuviyo lenu umbalisi uwise imali ngaphansi kwetafula. Ekuthanyeleni kwenu uyithole ithe qekele laphaya. Kuyini okumele ukwenze nxa isidingakala?

a) Kufanele ngimazise umbalisi ukuba ngidobhe imali ngaphansi kwetafula yakhe ingakabuzwa.

b) Ngiyaphika ngembe phansi ukuba ngike ngayibona.

c) Nxa kungelabufakazi obuqinileyo ngiyazithulela lami.

C) Umnyaka usuphelile. Seligqibile labhala lemihloliso yenu. Pho awenzanga kuhle ngoba ubungabhali imisebenzi yababalisi. Asikhulumi ngokubala. Impumela ikuchaya obala ukuba kade uzidlalela. Nanso lemibhalo yababalisi ikhomba ukuba kumele uguqule izenzo. Ufika ebadaleni uthini ngesenzo sakho esikubulele kangaka. Khetha isenzo esiqondileyo lapha:

a) Ufika ebazalini ukhulume ukuba aliphiwanga incwadi zempumela yalowomnyaka.

b) Ufika ebazalini ulokuzisola ucele ukuphiwa ithuba lokuzama kumnyaka ozayo.

c) Ufika ebazalini lencwadi esicitshacitshiwe engelankulumo yababalisi ehambelana lempumela yakho.
Siyabonga bafundi, ngilethemba siqhubeka sithola ukuqondiseka kanye lokuzuza izimpendulo eziqondileyo ekuphileni kwethu. Asihlaleni sizikhuza bafundi abahle. Asihlanganeni kwelizayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds