uMthunywa
Siphathokuhle Ngulube
Salibonani bafundi. Ngithemba liqhuba kuhle ezifundweni zenu zonke. Siyaqhubeka njalo ngezifundo zethu zenkulumo ngomumo. Ngeviki ephelileyo sikhangele amazwi aphathelane lokwenda kwentombi. Sizaqhubeka njalo ngalawo magama ukuze sikwazi ukuwasebenzisa kuhle ezinkulumeni zethu zansuku zonke. Sizakhangela amagama alandelayo
1. Icholo, 2. Utshwala bezigubhu, 3. Ukuphinda ukumikhondo, 4. Inkomo yohlanga, 5. Umphekiso, 6. Ukunikwa amaseko, 7. Ukucola
Icholo
Leli ligama esilijayeleyo kakhulu ukulizwa. Mhlawumbe kwesinye isikhathi siyabe singakwazi ukuthi lisetshenziswa kubani njalo kutheni. Icholo belande kakhulu izolo. Bekuyilo uphawu okubonakala ngalo ukuthi intombi ayiseyiyo ntombi kodwa isingene ezingeni lokuba ngumama.
Kulezi insuku uphawu lolu solwande ukuba yindandatho. Liyini kanti icholo leli? Icholo zinwele ezazisala esiphundu ngemva kokuba intombi isigeliwe ngemva komthimba. Icholo lalifakaza ukuthi uZibanibanyana usengunkosikazi womuntu.
Utshwala bezigubhu
Butshwala obunjani lobu? Lobu butshwala obabande ukunathwa kakhulu izolo. Babunathwa yizihlobo eziseduze lapha ekhaya. Babuphekwa kubongwa kakhulu inyama okuthiwa yisigubhu. Isigubhu yinyama eyayiphiwa isihlobo sentombi esiseduze, esihlala duze lalapho okwendela khona intombi.
Awu heee kwakuhlaliswene phela bafundi ngalezo nsuku. Ukudla kwakungancitshanwa njengalamuhla! Lamuhla sebebalutshwana abasaliqhuba leli isiko kodwa kuhle sihlale silazi
Ukuphinda imikhondo
Kusasekhona lakhathesi, kuyenziwa kweminye imizi lanxa nje ukuqhutshwa kwakhona kungathi kuyatshiyana. Amagama la akhulunywa nxa kulandiswa ngesenzo sentombi esokubuyela ngakibo okokuqala ngqa silokhe sendayo. Kulapho ke intombi efika ithathe ezinye izimpahla ezingabe zazisele mhla womthimba.
Yikho futhi ngalesi isikhathi efika itshiye umthanyelo wayo, isibuyela yodwa. Abadala basebesithi uZimbence uyephinda imikhondo.
Inkomo yohlanga
Intombi nxa isiyakwenda iyalotsholwa, ayihambi mahala. Lo ngumkhuba obusenziwa izolo kanti lalamuhla usaqhutshwa unjalo. Kulihlazo ukuthi intombi iphume iyekwenda ingakhutshelwanga lutho. Ngokunjalo ke kufanele ikhuphe izinkomo ezimbalwa. Phakathi kwezinkomo lezi inkomo eyodwa iba ngekamama.
Yiyo ke inkomo ebizwa ithiwe ngeyohlanga. Kanti uyayisa ngaphi inkomo umama njengoba isibaya singesikababa. Impendulo ithi ngeyakhe inkomo umama, wenza akufisayo ngayo.
Sizakuma lapha kule iviki, sizaqhubeka sixoxa ngamanye amagama aphathelane lokwenda kwentombi kuviki ezayo.
Asihlanganeni ngeviki elizayo, sifunde okunengi. Salani kuhle!
