SETHULE, nangu umuntu wemzini uyeza. Uyasisitheka yeka. Nangu umntwanyana egumeni uyazidlalela. Ugijima angene endlini abuye aphume njalo.
Isethekeli sesize sisondele lapha ekhaya. Isethekeli sekufanele sikhuleke lapha esangweni. Isimanga yikuba laba abasibonayo abanaki lokuba basethule umthwalo lo esisisitheka ngawo. Sebayangaphi ubuntu bayizolo bandla?
Izolo umuntu omdala ubethi angabonakala esindwa ngumthwalo ancediswe layiloba ngubani. Angikhulumi ngalo osenxwanele iguma elithize. Lo usebonakala ukuba yisethekeli sakozibani. Izolo owethekelayo ubeligugu likaZulu ngoba ubefika ekhaya kujabule umuntu wonke.
Angisabali okhekhe labo bajabula besazi ukuba ukuza komuntu wemzini sebezaphumula ukudla umxhoxhozo womfushwa. Abadala bazayobula okulizinyane kumbe iqhude ligijinyiswe lize lidinwe, libanjwe. Oseduze laye ngohambo lwakhe, yayisiwa ngophondo nxa kufanele inkomo. Lapho kuyabe kusaziwa isisindo sohambo lwesethekeli lesi.
Ukwethula umuntu umthwalo wakhe bekungumkhuba omuhle njalo siqhubeka siwulandela ngoba kuyindlela yokwemukela isihlobo sakho kumbe umuntu wemzini umtshengise uthando ekufikeni kwakhe.
Ukungethuli umuntu ofikayo kulihlazo kanye lendelelo nxa sibuka kumikhuba yokwemukelwa kwezihambi. Umuntu ongaphakamiyo ngokufika kwesihambi kalathando laso. Omane azigoqe akhangele le ngosuthayo, ongelandaba lomunye. Okunye kungaba yikuncitshana.
Ophayo usuke ethule, amukele isihambi ngezandla ezivulekileyo, abelothando ekubingelelaneni kanye lasekusinakekeleni ekudleni lasekulaleni. Intsha yanamuhla ayisakwazi lokhu esikulandisayo. Imvama iyakhangela isethekeli ingazihluphi ngaso. Kuqakathekile ukuhlangabeza isethekeli ngo “ Sethule!”
Lo ngumutsho opheleleyo opha isihambi uthando lokwemukelwa. Uzizwa usekhaya nxa wemukelwe wethulwa. Uthi usiyangena endlini nje yonke imithwalo isiphethwe ngabalapha ekhaya. Okulandelayo yisiphatho esihle.
Asibuyeleni kumikhuba lamasiko ethu akudala bathandekayo. Abakhathesi abantwana abasafundiswa ngalo umkhuba ngoba sibona nxa bethi bangethula isihambi batshitshe phambili bathi bangangena endlini baqhubeke lemithwalo yaso besiya emaxhibeni.
Bekungenziwa lokhu izolo. Isihlobo kumbe isihambi besisethulwa siqhutshwe sisiya ebadaleni. Yibo asebezalawula okulandelayo.
Esesifazana sizaqhutshwa- ke siyengakumaxhiba amantombazana. Owesilisa laye ngokunjalo uzasiwa kuxhiba lezinsizwa nxa lingekho igumbi lezethekeli. Isihambi sesizakhulula- ke umthwalo lo obotshiweyo abele abekhaya abaphathele khona. Ngumngenandlini – ke lo. Abekhaya sebezabusa ngomqhina obuye lalesisihambi. Akuqalwa ukuba ngu qha phambili, lethule libeke emsamo umqhina wesihambi.
Lihlazo lelo. Ikujwayele intsha yanamuhla. Kuze kudale ukungabongi kwabasekhaya ngoba bengazi okubuye lesihambi.
Asilandeleni izindlela zakudala. Zazihlolisiswe zabunjwa kuhle. Ezakulezi izinsuku zimazombe. Zilamaphutha. Asethuleni isihambi sisemukele, sisiphathe kuhle. Umhlalandlini uvulwe. Kuphekwe kugcadwe ngoba esomhambi bathi asinganani, singangophonjwana lembuzi.
