Siphathokuhle Ngulube
Salibonani bafundi. Ngithemba liqhuba kahle ezifundweni zenu njalo lemihloliso yokuphela kwethemu ihamba kahle. Lamuhla sizakhangela ukuphathwa kokufa esintwini. Ukufa bekuyinto engajwayelekanga izolo njengalamuhla. Yikho phela bekucatshangelwa ukuba umuntu angabe ethakathiwe kumbe kukhona okudale lokho kufa.
Izolo bekukholwa ukuthi umuntu kafi nje manga manga. Bekudingwa sibili imbangela yalokho kufa. Ukufa kwabantu kusiya ngobudala bekuphathwa ngezindlela ezitshiyeneyo. Lamuhla sizagxila kakhulu ekufeni kwengane. Bekusenzeka phela ukuthi umama akhulelwe kodwa kuthi nxa kufika isikhathi sokuthi akhululeke kwehlule. Ingane ibe isizalwa ifile. Lokhu bekungabe kudalwe yizinto ezehlukeneyo, labathakathi bebecatshangelwa lapha.
Nxa kwenzakale ngale indlela bekuthiwa umama uswele. Ingane eswelakeleyo ibingenzelwa umngcwabo onjengowontwana ozelweyo waphila okwesikhatshana. Umntwana oswelakeleyo ubengagejelwa ngcwaba, hatshi bekuzila kanti futhi ubengabuthanelwa ngabantu abanengi. Bekuthi ogogo abambalwa baye kulo umama osweleyo bafike bathathe umzinjana lo oswelakeleyo bayewufihla emhomeni. Umhome lo ubuvalwa ngamatshe izalukazi lonina womntwana besebefulathela bebuyela ekhaya.
Okunye okumqoka okumele sikunanzelele yikuthi unina wengane le eswelakeleyo bekungamelanga akhale. Bekuzila lokhu ngoba kuthiwa angakhala uzalaluka engasatholi abanye abantwana.
Kunjalo nje ubengabuthanelwa ngabantu kumbe ukuthi ayekhalelwa ngokulahlekelwa kwakhe. Abantu bebemane bamkhangele nje angathi akwenzakalanga lutho. Lamuhla sekulomahluko omkhulu kakhulu ngoba wonke umuntu usengcwatshwa ngebhokisi sibi sosana lolu oluzelwe lufile.
Kunjalo nje lolu usane solubuthanelwa ngabantu angathi ngumuntu omdala. Unina womntwana laye sekhalelwa kube lesililo sibili sangathi kubhubhe umuntu omdala.
Okunye njalo umntwana lo segejelwa lengcwaba. Zinengi izinto ezingabe sezidale inguquko le. Okunye kungabe kuyikuhlanganela kwemihlobo ethile. Lokhu sekusenza abantu balahle isiko labo bathathe okungayisikho kwabo.
Okunye njalo isiKhristu laso sesidale umahluko omkhulu ekwenzeni izinto. Isintu sesihambe salahleka. Ukufunda lakho sekwenze abantu beyisa kakhulu isiko lokungcwaba ebeliqakathekile. Umngcwabo ususenziwa ubengathi usamtshado. Uthole abantu sebewulungiselela baze bathenge lezigqoko zokugqoka ngalelolanga. Ukuzila lenhlonipho ebiphiwa ukufa sekwahamba kwatshabalala. Ukufa sekuphathwa nje sangathi ngumdlalo othile.
Asazi kuyini osekudale lokho! Mhlawumbe yikho ukuthi ukufa sekukunengi, akusethusi njengakudala. Kuhle sibe lalo ulwazi ngengqubo eyenziwayo nxa kuthe kwafiwa ngekhaya ukuze singabi lihlazo. Asihlanganeni ngeviki ezayo.
