Innocent Kurira
KUBADLALI beChicken Inn, ukunqoba iFC Platinum kuzakhulula inhliziyo zabo, kubabisele ithemba lokuthi basesekhona emkhankasweni weCastle Lager Premiership.
Abadlali laba bayavuma ukuthi selokhe isizini yaqalisa, bayehluleka ukubukisa umdlalo omuhle, njalo kudingeka ukuthi batshintshe ukwenza ngoba bahlangana leFC Platinum lamuhla emini.
IPure Platinum Play ikhokhela ingalane kuligi yeCastle Lager. Leliqembu lidlula likhangele eceleni enkundleni, okokuthi nxa iChicken Inn ingayekethisa, izakhala ingaqedi.
IChicken Inn iqede imidlalo eyisithupha isehluleka ukunqoba. Yenelisa ukuba ngutshiki lobhanqa kumidlalo emine, yanqotshwa kabili.
IFC Platinum kayikanqotshwa kumidlalo elitshumi. Isinqobe kweyisikhombisa, yabanjwa kwemithathu.
Ukaputeni wamaGameCocks uXolani Ndlovu uthe kuzamele bahlakaniphele ukuhlohla.
“Njengokaputeni ngilethemba. Sidlala leqembu elilabadlali abalethalenta. Akusoke kubengumdlalo olula lo. Bayakwazi abakwenzayo. Sizadlalela ekhaya ngakho kumele siqaphele kulokhu, sinqobe,” kutsho uNdlovu.
Omunye wabadlali beChicken Inn, uMichael Charamba uthe ukunqoba kwabo iArenel ngempelaviki kubenze baqina.
“Sinqobe iArenel okukhweze idlabuzane eqenjini kumalanga adluleyo. Singanqoba iFC Platinum kuzasinceda kakhulu.”
Umgadli u-Itai Mabunu uthe: “Umdlalo omkhulu kithi njalo kasiwuthathi kancane.”
Kulelibanga lokuthengwa kwabadlali, iChicken Inn isithole u-Albert “Zouma” Nyamutsaka, oleminyaka engu-27 yokuzalwa, obedlala kuGolden Eagles, kuZifa Division One, eNorthern Region.
Wake wadlalela iGaborone United eBotswana. UMpumelelo Bhebhe usephendukile evele eMelika. UMiguel uselilunga leChicken Inn evela kuBulawayo Chiefs. Omunye okhangelelwe ukuvezwa nguKudzaishe Dzingwe.
