Ethel Ncube
KUDABA oluhlasimulisa umzimba kulelinye inina lelokitshini leMganwini koBulawayo elilomtwana olomnyaka owodwa elimlengise ngenyawo qede lamtshayelelwa phansi lamkhahlelwa ubuso, uMthunywa uyakuveza lokhu lamhlanje.
Umetheswacala esingeke saqamba igama lakhe ngenhloso yokuvikela umntwana, oleminyaka engu-41 yokuzalwa kubikwa ufike waphakamisa umntwana olomnyaka lenyanga eziyisifica minwe mibili obehlezi phansi ngeviki ephelileyo wamtshayelela phansi ngesihluku okubangele ukuthi alimale ithambo lekhanda.
Kucatshangelwa ukuba umetheswacala uthatha izidakamizwa.
Omele isikhulumi samapholisa koBulawayo uAssistant Inspector Nomalanga Msebele uqinisekisile ngendaba le.
“Sibophe owesifazana okucatshangelwa ukuthi walengisa usane olulomnyaka owodwa ngonyawo wabuye walutshayelela phansi andubana alukhahlela kabuhlungu ebusweni kanenginengi okwabangela ukuthi lulamile ithambo lekhanda.
“Usane lwathwalelwa esibhedlela seMpilo lapho olulaliswe khona.
“Ekuchwayisiseni ngodaba lolu, amapholisa ananzelela ukuthi umetheswacala ngumuntu osebenzisa izidakamizwa njalo kaphilanga kuhle engqondweni,” kutsho uAsst Insp Msebele.
“Sicela uzulu ukuba nxa elesihlobo esingaphilanga kuhle engqondweni ahlale esikhangela njalonje ukuze sithole usizo masinyane kungakabi lomonakalo . Kumqoka njalo ukuthi benze lokhu ukuze abantwana kanye labanye nje abantu abahlala labo bahlale bephephile”.
Kusenjalo amapholisa adinga umuntu ongabe elolwazi ngesigebengu esagwaza enye
indoda esesimeni esibi esibhedlela seMpilo kulandela ukutholakala kwayo ithe daca phansi elokitshini lePumula South kuviki ephelileyo.
Kubikwa umamangala kamazi owamlimazayo kodwa watholwa ngesinye isihambi esasisedlula.
Umamangala watholakala elamanxeba ekhanda, eqolo, lasenyaweni.
Amapholisa aphethe ngokuthi uzulu atshiye umkhuba wokuhamba ethwele izikhali eziyingozi ngoba kulicala.
“Sidinga ulwazi olungasincedisa ukuthi sibophe owadala icala leli,” kubika uAsst Insp Nomalanga Msebele.
